Tmerri në Selanik: 47-vjeçarja shqiptare denoncon partnerin për dhunë brutale dhe përdhunim

Një ngjarje e rëndë ka tronditur qytetin e Selanikut, ku një grua 47-vjeçare i është drejtuar autoriteteve policore për të denoncuar partnerin e saj 46-vjeçar, i cili akuzohet për dhunë fizike dhe abuzim seksual. Zbulimi i këtij rasti tronditës ka ndodhur pasditen e së premtes. Gjatë një patrullimi rutinë, efektivët e policisë greke kanë konstatuar një grua pranë një automjeti, brenda të cilit ndodhej edhe bashkëshorti i saj. Duke vënë re shenjat e saj për ndihmë dhe duke dyshuar se ajo po përballej me një situatë kritike, uniformat blu kanë ndërhyrë menjëherë. Të dy personat janë shoqëruar pa vonesë në komisariat, ku 47-vjeçarja ka gjetur guximin të rrëfejë kalvarin e vuajtjeve dhe dhunës së pësuar nga partneri i jetës. Në dëshminë e saj para autoriteteve, ajo ka treguar se 46-vjeçari e kishte goditur dhe ushtruar dhunë fizike ndaj saj gjatë ditës së premte, si në ambientet e pallatit ku banonin, ashtu edhe brendësisht në automjet. Për më tepër, ajo ka bërë me dije se vetëm një ditë më parë, i dyshuari e kishte sulmuar fizikisht dhe e kishte detyruar të kryente marrëdhënie seksuale pa dëshirën e saj. Pas zbardhjes së ngjarjes, efektivët e policisë greke kanë kryer arrestimin e 46-vjeçarit me origjinë shqiptare. Tashmë ai do të përballet me drejtësinë, pasi ndaj tij rëndojnë akuzat zyrtare për dhunë në familje, përdhunim dhe heqje e paligjshme të lirisë.