Operacioni “Taksia”: Kapet në Dibër 30-vjeçari që po transportonte kallashnikov dhe pistoletë drejt Maqedonisë së Veriut

Një 30-vjeçar nga Durrësi ka rënë në prangat e policisë pasi është kapur duke transportuar armë zjarri dhe municion luftarak nëpërmjet një mjeti taksi. Policia ka ndërhyrë në kuadër të një operacioni të mirëorganizuar. Bëhet fjalë për finalizimin e operacionit policor të koduar “Taksia”, i cili u zhvillua nga specialistët e Komisariatit të Policisë Dibër në bashkëpunim të ngushtë me Seksionin Operacional të Drejtorisë Vendore të Policisë Dibër. Si rezultat i këtij aksioni, u bë i mundur arrestimi në flagrancë i shtetasit Arbër Tivari, 30 vjeç, banues në qytetin e Durrësit. Gjatë kontrollit të detajuar që efektivët e policisë ushtruan në automjetin e linjës taksi që drejtohej nga i dyshuari, në vendin e njohur si “Rrethrrotullimi i Bllatës”, në sediljen e pasme u zbuluan fshehur një armë zjarri kallashnikov e pajisur me 13 fishekë, si dhe një armë zjarri pistoletë, e cila kishte një fishek në fole dhe një tjetër në krehër. Të dyja armët e zjarrit, së bashku me municionin luftarak, u sekuestruan në cilësinë e provës materiale për t'i shërbyer hetimeve të mëtejshme. Paraprakisht, nga të dhënat e para të siguruara gjatë veprimeve hetimore, dyshohet se 30-vjeçari i kishte siguruar këto armë në zonën e Tufinës në Tiranë. Plani i tij ishte që t'i transportonte ato drejt territorit të Maqedonisë së Veriut, duke shfrytëzuar kalimin përmes kufirit të gjelbër. Në përfundim të veprimeve të para hetimore, materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Dibër, e cila do të ndërmarrë hapat e mëtejshëm ligjorë ndaj të arrestuarit.