Daniel Dubois shkëlqen sërish, mbron titullin botëror me nokaut teknik ndaj Fabio Wardley

Boksieri britanik Daniel Dubois ka konfirmuar edhe një herë dominimin e tij në peshën e rëndë, duke mbrojtur me sukses titullin e kampionit të botës në versionin WBO, pasi mposhti me nokaut teknik në raundin e dytë bashkëkombësin e tij, Fabio Wardley. Kjo përballje shënoi një epërsi të plotë të Dubois në revanshin mes tyre, i cili u zhvillua vetëm pesë muaj pas suksesit të tij në duelin e parë. Në takimin e mbrëmshëm të zhvilluar në “O2 Arena” të Londrës, në ring foli vetëm Dubois – i cili tani regjistron 24 fitore dhe 3 humbje në karrierën e tij. Ai e surprizoi kundërshtarin duke e hedhur në tapet qysh në sekondat e para të raundit hapës. Kampioni e ruajti këtë ritëm të lartë përgjatë gjithë fraksionit, derisa gongu i dha një pauzë shpëtimtare Wardley-t për t'i shpëtuar nokautit të menjëhershëm. Megjithatë, epërsia e Dubois vazhdoi edhe në raundin e dytë. Në çastet e fundit të tij, stafi teknik i Wardley – i cili numëron 20 fitore, 2 humbje dhe 1 barazim në karrierë – u detyrua të hidhte peshqirin në shenjë dorëzimi. Pas ndërhyrjes së gjyqtarit për të ndalur sfidën, Daniel Dubois nisi festimet e merituara, duke vulosur një paraqitje ku ishte zot i padiskutueshëm i ringut. Pavarësisht pritshmërive për një rivalitet më të fortë, përballja tregoi qartë se Dubois ishte superior dhe e meritoi plotësisht triumfin. Nga ana tjetër, Wardley hyri në këtë revansh me synimin për të ndryshuar fatin e ndeshjes së parë, por dështoi të shfaqte cilësitë e tij, duke u detyruar të pranojë humbjen e radhës.