Tensionet në Shqipëri, reagimi i ashpër i Uashingtonit: Dhuna nuk është protestë qytetare, kërkohet qetësi

Ambasada e Shteteve të Bashkuara të Amerikës në Tiranë ka dalë me një qëndrim zyrtar lidhur me situatën e tensionuar dhe protestat e fundit në vend, duke apeluar për maturi dhe zhvillimin e tubimeve në rrugë paqësore. Përmes një deklarate për media, selia diplomatike amerikane ka nënvizuar se aktet e dhunës, lëndimet fizike dhe dëmtimi i pronës publike apo private nuk mund të konsiderohen në asnjë mënyrë si forma të angazhimit qytetar, duke kërkuar njëkohësisht vetëpërmbajtje nga të gjitha palët e përfshira. “Dhuna, trazirat, lëndimi fizik i të tjerëve dhe shkatërrimi i pronës nuk janë angazhim qytetar. U bëjmë thirrje të gjithë qytetarëve që zgjedhin të demonstrojnë ta ushtrojnë të drejtën e tyre për protestë në mënyrë paqësore, pa akte të dhunshme. U bëjmë thirrje të gjitha palëve për vetëpërmbajtje dhe qetësi”, thuhet në reagimin e Ambasadës Amerikane.