Kryeqyteti austriak vishet me art shqiptar: Kur baleti dhe poezia bëhen bashkë në Vjenë

Vjenë, 16 tetor 2026: Salla e qendrës kulturore ‘‘Brunnepassage’’ është mbushur plot në kuadër të një ngjarjeje të jashtëzakonshme artistike, ku u ndërthurën baleti, muzika dhe letërsia shqipe, duke i dhuruar publikut vendor dhe atij austriak një nga mbrëmjet më mbresëlënëse të viteve të fundit. Ky aktivitet i kuruar me kujdes u shndërrua në një platformë ideale dialogu, ndjeshmërie dhe reflektimi përmes lëvizjes dhe fjalës së artë. Në qendër të vëmendjes ishin shfaqja ‘‘Hope’’ e Baletit Kombëtar të Kosovës dhe prania e shkrimtares së njohur nga Tirana, Mimoza Ahmeti, ndërsa ngjarja u realizua falë mbështetjes së Ambasadës së Republikës së Kosovës dhe shoqatave Action for Help, KA, si dhe Lidhjes së Shkrimtarëve dhe Krijuesve Shqiptarë në Austri ‘‘Aleksandër Moisiu’’. Në nisje të mbrëmjes, fjalën e mori Ermal Vejsa në emër të nikoqirit, shoqatës KA nga Vjena, i cili i uroi mirëseardhjen të pranishmëve. Më pas, Nezaqete Rukovci mbajti një fjalë rastësie, ku vuri theksin te rëndësia e ndërgjegjësimit shoqëror rreth sëmundjes së kancerit dhe domosdoshmërisë së mbështetjes për personat që po e përballojnë atë. Vetë shfaqja ‘‘Hope’’, e vënë në skenë me koreografi të Sead Vuniqit, përcjell mesazhe të fuqishme përmes gjuhës universale të trupit, duke synuar luftimin e paragjykimeve dhe stigmatizimit ndaj sëmundjeve, si dhe duke ngritur në vëmendje sfida thelbësore të shëndetit publik. Performanca e trupës kosovare ngjalli emocione të thella te spektatorët, të cilët e duartrokitën gjatë në shenjë mirënjohjeje pas mbylljes. Pjesa e dytë e mbrëmjes i u kushtua orës letrare me autoren e shquar Mimoza Ahmeti, një ndër zërat më produktivë dhe të suksesshëm të letrave shqipe. Bashkëbisedimi me të u moderua nga Anton Marku, kryetar i Lidhjes së Shkrimtarëve dhe Krijuesve Shqiptarë në Austri ‘‘Aleksandër Moisiu’’, ndërsa interpretimi i teksteve të përzgjedhura u realizua nga Gabriela Mujaj. Atmosfera u pasurua me pika muzikore në kitarë nga kantautori Flamur Ahmeti, kurse në sallë ishte e pranishme edhe përkthyesja dhe botuesja e librave të Ahmetit në gjuhën gjermane, Loreta Schillock, e cila drejton shtëpinë botuese ‘‘Loreta Schillock Verlag’’. Gjatë prezantimit të profilit të saj artistik, u theksua se Mimoza Ahmeti mbetet një autore tejet e dashur për lexuesit, një personalitet origjinal dhe shpirt i lirë në çdo dimension krijues. Ajo njihet gjerësisht si poete, prozatore, romanciere, eseiste, përkthyese, por edhe si autore këngësh e këngëtare, ndërsa ndër sukseset e saj ndërkombëtare spikat fitimi i çmimit ‘‘Palma e Artë’’ në festivalin prestigjioz të poezisë ‘‘San Remo’’ në vitin 1998, organizuar nga RAI. Diskutimi u shtri te letresia si art, kultura e leximit dhe ndikimi i gjerë i saj në shoqëri, ndërsa në përmbyllje të takimit, audienca pati mundësinë të drejtonte pyetje, të cilat u fokusuan kryesisht te zhvillimet aktuale në Shqipëri. Lidhja e Shkrimtarëve dhe Krijuesve Shqiptarë në Austri ‘‘Aleksandër Moisiu’’, e themeluar në vitin 2011, shënon këtë vit 15-vjetorin e themelimit të saj. Ajo përbën adresën kryesore të krijuesve tanë në tokën austriake dhe pikë referimi për letërsinë shqipe jashtë kufijve. Përmes një angazhimi serioz dhe organizimit të më shumë se 80 orëve letrare e promovimeve, kjo lidhje ka ndërtuar ura të suksesshme bashkëpunimi me institucionet kyçe kombëtare, përfshirë ministritë e Kulturës, Arsimit e Diasporës, si dhe ambasadat e Shqipërisë dhe Kosovës në Vjenë.