Skandali në Prishtinë: Tre policë kërkojnë favore seksuale nga shoferja pa patentë

Një ngjarje e rëndë është regjistruar në mesnatën e 15 tetorit, ku tre zyrtarë policorë gjatë kohës së patrullimit kanë ndaluar një automjet që drejtohej nga një e re. Gjatë kontrollit rutinë, u konstatua se drejtuesja e mjetit nuk posedonte patentë shoferi. Për të shmangur gjobën, efektivët i kanë propozuar asaj që të shkonte me ta në një motel në zonën e Çagllavicës në këmbim të favoreve seksuale. E reja është nisur me veturën e saj pas tyre, por rrugës ka ndryshuar drejtim për te tezja e saj, e cila është po ashtu punonjëse e policisë. Së bashku me familjaren, ajo është drejtuar te rrethi i Çagllavicës, ku zyrtarët policorë po prisnin, por nga automjeti i tyre nuk ka dalë askush. Në vend të kësaj, familjarja e viktimës ka ndërhyrë duke i njoftuar se kishte përpiluar një raport të hollësishëm për t'ia dorëzuar komandantit të Stacionit Policor "Jugu" në Prishtinë. Menjëherë pas kësaj, rasti është denoncuar zyrtarësisht në organet e rendit, duke dorëzuar edhe provat materiale. Pas këtyre veprimeve procedurale, Inspektorati Policor i Kosovës ka ngritur dyshime se tre efektivët e rinj në detyrë kanë kryer dy vepra penale. Në lidhje me këtë skandal, me urdhër të prokurorit pranë Prokurorisë Themelore në Prishtinë, është hapur një procedurë penale ndaj të dyshuarve.