Tragjedi në Florida: Aligatori sulmon dhe lë të vdekur 71-vjeçarin teksa po peshkonte në park

Një ngjarje e rëndë ka tronditur shtetin amerikan të Florida-s, ku një 71-vjeçar ka humbur jetën të premten pasi është sulmuar nga një aligator teksa po peshkonte brenda një parku në Winter Garden. Shefi i policisë, Michael Mason, ka konfirmuar se zvarraniku që ndërmori sulmin fatal është kapur dhe më pas i është nënshtruar eutanazisë. Specialistët e faunës së egër neutralizuan një aligator me gjatësi afro 3,6 metra, i cili dyshohet fuqimisht se qëndron pas kësaj tragjedie. Autoritetet kompetente, konkretisht Komisioni për Ruajtjen e Peshqve dhe Kafshëve të Egra në Florida (FWC), bënë të ditur se viktima është qytetari Steven Hamilton, banor i zonës në Winter Garden. Komandanti i zjarrfikësve, Jose Gainza, shpjegoi se ekipet e emergjencës tentuan menjëherë ta nxirrnin viktimën nga uji, por ndërhyrja u komplikua ndjeshëm për shkak të pranisë së disa aligatorëve të tjerë në afërsi. Trupi i pajetë i 71-vjeçarit u arrit të rikuperohej vetëm rreth orës 19:00 me kohën lokale. Ngjarja ndodhi në Parkun Përkujtimor "Dr. Bradford", i cili shtrihet përgjatë brigjeve të liqenit Apopka. Sipas statistikave zyrtare, ky liqen strehon një nga kolonitë më të mëdha të aligatorëve amerikanë në pjesën qendrore të Florida-s. Sipas të dhënave historike të FWC-së, të mbledhura që prej vitit 1948 për sulmet e paprovokuara, janë shënuar gjithsej 500 raste kafshimi, prej të cilave 32 kanë rezultuar fatale. Statistikat tregojnë se gjatë vitit 2025 u regjistruan 13 sulme, nga të cilat dy përfunduan me vdekje. Më parë, në vitin 2024 pati 11 kafshime pa pasoja fatale, në vitin 2023 u shënuar 23 raste me dy viktima, në vitin 2022 pati 11 sulme ku dy prej tyre ishin fatale, ndërsa në vitin 2021 u regjistruan nëntë kafshime pa viktima.