Inovacioni i radhës apo thjesht marketing? A do të sjellë makina fluturuese e Tesla-s fitime reale për kompaninë

Giganti i automjeteve elektrike, Tesla, ka zbuluar zyrtarisht gjeneratën e re të modelit Roadster gjatë një eventi të zhvilluar të enjten në Teksas. Gjatë kësaj prezantimi, një nga tre variantet e reja të kësaj supermakine kreu një manovër spektakolare, duke demonstruar aftësi fluturimi përmes përdorimit të teknologjisë hapësinore. Megjithatë, pavarësisht bujës së madhe dhe interesit të publikut, ekspertët dhe analistët e tregut ekonomik nuk parashikojnë që ky model të sjellë të ardhura financiare të konsiderueshme për kompaninë. Drejtori ekzekutiv i Tesla-s dhe bashkëthemelues i SpaceX, Elon Musk, solli në vëmendje një skenë të ngjashme me filmat e famshëm “Knight Rider”, duke shfaqur potencialin inxhinierik të sipërmarrjeve të tij. Automjeti i ri është pajisur me motorë me gaz të ftohtë, të dizajnuar duke zbatuar teknologji të huazuara nga agjencia hapësinore SpaceX. Si pasojë e vëmendjes së madhe mediatike, aksionet e Tesla-s regjistruan një rritje gjatë seancës së së premtes. Edhe pse demonstrimi bëri bujë të madhe në mbarë botën, analistët financiarë vlerësojnë se vlera tregtare e këtij produkti mbetet mjaft e kufizuar. Mamta Valechha, analiste e tregut te Quilter Cheviot, e cilësoi këtë zhvillim si një “moment të jashtëzakonshëm inxhinierik”, i cili u ideua kryesisht për të nxitur emocione te konsumatorët dhe për të fuqizuar imazhin e markës. Nga ana e lor, Rico Luman, ekonomist i lartë pranë bankës ING për sektorin e transportit, e quajti ngjarjen një taktikë të zgjuar marketingu që nxjerr në pah shpirtin inovativ të Tesla-s. Sipas tij, automjetet vazhdojnë të mbeten të lidhura ngushtë me emocionet dhe stilin e jetesës, çka e bën këtë demonstrim mjaft mbresëlënës për blerësit. Ndërkohë, Gene Munster nga Deepwater Asset Management e vlerësoi shfaqjen në rrjetin social X si një dëshmi të forcës inxhinierike të kompanisë, por pa ndonjë ndikim të mirëfilltë komercial përtej sfidimit të prodhuesve tradicionalë të automjeteve. Vetë Elon Musk e ka pranuar më parë se ndikimi financiar i këtij modeli pritet të jetë i ulët. Analistja Valechha thekson se funksioni kryesor i këtij automjeti do të jetë konsolidimi i reputacionit të Tesla-s si lider në inovacion, dhe jo gjenerimi i fitimeve të mëdha. Kompania ka bërë të ditur se prodhimi serik i Roadster-it është planifikuar të nisë gjatë vitit 2028. Megjithëse Tesla ka nisur tashmë pranimin e rezervimeve, versioni i pajisur me aftësi fluturimi do të ofrohet vetëm përmes ftesave speciale, ndërkohë që çmimi zyrtar ende nuk është bërë publik. Modeli Roadster u prezantua për herë të parë në vitin 2017, ndërsa një vit më vonë Musk la të kuptohej se motorët shtytës mund t'i jepnin mundësinë automjetit të ngrihej në ajër. Ky projekt u shoqërua me shtyrje të njëpasnjëshme, pasi fillimisht prodhimi ishte premtuar për vitin 2020. Sipas analistëve, rreziqet që lidhen me besueshmërinë dhe realizimin praktik të këtij projekti mbeten tejet të larta. Sa i përket mundësisë së një tregu më të gjerë për makinat fluturuese, ekspertët shprehen skeptikë. Karakteristikat e fluturimit të Roadster-it nuk posedojnë miratim për qarkullim të lirë në rrugët publike, çka përbën një tjetër pengesë të madhe ligjore krahas kostove të larta të prodhimit. Eksperti Rico Luman shpjegon se pavarësisht se makina është konceptuar si një automjet sportiv unik, përdorimi i saj në masë nuk është i realizueshëm në të ardhmen e afërt. Për këto automjete zbatohen të njëjta rregullore të rrepta të hapësirës ajrore që vlejnë për avionët, duke kërkuar kështu certifikim zyrtar nga autoritetet përkatëse evropiane si EASA. Nga ana e saj, Agjencia e Sigurisë së Aviacionit e Bashkimit Evropian (EASA) ka theksuar se çdo automjet që synon të funksionojë si mjet fluturues detyrohet të respektojë standardet ndërkombëtare të sigurisë ajrore, çka mund të nënkuptojë gjithashtu pajisjen e drejtuesve me licencë piloti, krahas sfidave të tjera të shumta në hapësirën e mbipopulluar ajrore.