Drita merr tri pikë të arta në Podujevë dhe thellon krizën e Llapit

Kampionia në fuqi e Kosovës, Drita e Gjilanit, karegjistruar një fitore të rëndësishme në udhëtim ndaj Llapit, duke e mbyllur takimin me rezultatin 2:1 dhe duke konfirmuar formën e lartë në elitën e futbollit vendor. Falë këtij triumfi, gjilanasit arkëtojnë pikë të plota dhe afrohen ndjeshëm me kreun e renditjes tabelare, ndërkohë që skuadra e Llapit vazhdon të mbetet e zhytur në vështirësi dhe rezultate negative. Pjesa e parë u mbyll e qetë, por shpërthimi i Dritës ndodhi menjëherë pas fillimit të fraksionit të dytë. Ishte mesfushori Vesel Limaj ai i cili zhbllokoi rezultatin në minutën e 47-të, falë një gjuajtjeje të fortë dhe të saktë nga distanca. Pa kaluar mirë gëzimi i mysafirëve, vetëm tre minuta më vonë, saktësisht në minutën e 50-të, Liridon Balaj përfitoi nga një situatë e favorshme, kaloi portierin vendas dhe dërgoi topin në rrjetën e boshatisur, duke dyfishuar shifrat në 2:0. Llapi tregoi shenja reagimi në minutën e 78-të, kur Arbnor Aliu realizoi një gol spektakolar, duke ngushtuar epërsinë në 2:1. Megjithatë, pavarësisht përpjekjeve në fund të takimit, vendasit nuk arritën dot të shmangnin disfatën në stadiumin e tyre. Pas përmbylljes së javës së dhjetë në Superligën e Kosovës, Drita ngjitet në pozitën e tretë me 17 pikë të tubuara, vetëm tri më pak se liderja e tabelës, Malisheva. Në krahun tjetër, situata paraqitet tejet alarmante për Llapin, i cili pozicionohet në vendin e nëntë me vetëm 4 pikë të grumbulluara deri më tani.