Vatikani jep lajmin e mirë: Papa Leo XIV lë sot spitalin pas operacionit delikat në mushkëri

Krerët e Vatikanit kanë konfirmuar se Papa Leo XIV ka marrë lejen mjekësore për t'u larguar nga spitali këtë të shtunë, vetëm pak ditë pas ndërhyrjes kirurgjikale për heqjen e një tumori kanceroz. Nëpërmjet një njoftimi zyrtar për shtyp, Selia e Shenjtë bëri të ditur se pas kontrolleve të mëngjesit nga stafi mjekësor, Ati i Shenjtë do të lërë ambientet e Spitalit Gemelli në Romë gjatë orëve të para të pasdites për t'u kthyer në Vatikan. Sipas planit, ai pritet të drejtojë nesër lutjen tradicionale Angelus nga dritarja e banesës së tij papnore. Ky vendim vjen pasi rezultatet e analizave të gjakut dhe radiografia e fundit e kraharorit treguan një gjendje të qëndrueshme shëndetësore, duke i hapur rrugën daljes nga spitali. 71-vjeçari ishte shtruar në spitalin romak që prej ditës së martë, kur iu nënshtrua operacionit. Gjatë ndërhyrjes kirurgjikale, e cila zgjati rreth 90 minuta brenda një periudhe treorëshe në sallën e operacionit, mjekët hoqën lobin e poshtëm të mushkërisë së djathtë. Vatikani konfirmoi se procedura rezultua plotësisht e suksesshme dhe pa asnjë ndërlikim, ndërsa analiza e indeve konfirmoi diagnozën e adenokarcinomës pulmonare, e cila ishte dyshuar që nga ekzaminimet paraprake. E enjtja shënoi një tjetër hap pozitiv në procesin e shërimit, pasi grafiku i kraharorit dëshmoi një rikuperim të kënaqshëm të pjesës së prekur të mushkërive, duke krijuar kushtet optimale për kthimin e Papës në rezidencën e tij.