Mourinho tregon se çfarë do të kishte bërë ai në vend të Vinicius Juniorit

Jose Mourinho ka prauar se, sikur të gjendej në situatën e Vinicius Juniorit, me gjasë do të ishte larguar nga radhët e Real Madridit gjatë merkatos së verës. Sulmuesi nga Brazil është përballur vazhdimisht me fyerje dhe sjellje raciste nga tifozët e ekipeve kundërshtare që nga momenti i transferimit të tij te gjiganti spanjoll në vitin 2018. Së fundmi, Vinicius u ndëshkua me karton të kuq në triumfin e Real Madridit ndaj Villarrealit, pasi u përfshi në një incident ku tërhoqi për flokësh një lojtar kundërshtar. Ky veprim i kushtoi me katër ndeshje pezullim, çka do të thotë se ai do të mungojë edhe në superpërballjen e 'El Clasicos' ndaj Barcelonës, e cila është caktuar të luhet më 25 tetor. Mourinho ka thurur elozhe për karakterin e brazilianit, duke e cilësuar si të jashtëzakonshme aftësinë e tij për të vazhduar ta shijojë futbollin dhe jetën, pavarësisht sfidave të mëdha që ka kaluar. “Është një djalosh spektakolar, me të cilin është e lehtë të krijosh marrëdhënie të mira. Është një djalë fantastik dhe meriton shumë respekt për faktin që vazhdon të jetojë, të përballojë gjithçka dhe të buzëqeshë”, ka deklaruar Mourinho. “Po të isha në vendin e tij, me shumë gjasë nuk do të isha këtu. Këtë verë do ta kisha detyruar largimin drejt një lige, një shteti apo diku tjetër, ku ka klube rivale dhe stadiume që e respektojnë”, ka shtuar ai. Pavarësisht gjithçkaje, pasioni i madh për fanellën e Real Madridit dhe për kryeqytetin spanjoll e ka shtyrë Viniciusin të vendosë që të qëndrojë gjatë në klub, duke kurorëzuar besimin e ndërsjellë me një kontratë të re të vlefshme deri në vitin 2032. “Pikërisht sepse e do Real Madridin dhe qytetin, sepse beson se gjërat mund të përmirësohen gjithmonë, ai rinovoi kontratën dhe vazhdon të buzëqeshë”, u shpreh Mourinho. Strategu portugez nënvizoi se askush nuk mund t'ia zbehë sulmuesit gëzimin për të jetuar, për të punuar dhe për të qenë pranë bashkëlojtarëve të tij, edhe pse pranoi se, si çdo qenie njerëzore, edhe ai mund të ndikohet nga klima përreth. Në një zhvillim tjetër, Mourinho preku edhe temën e tensioneve mes klubit madrilen dhe instancave drejtuese të futbollit spanjoll, duke parapëlqyer të mos zgjerohet shumë në këtë çështje. “Ka kufij dhe ka kufij. Mund ta justifikosh vetëm nëse bëhet fjalë për një rast klinik, përndryshe nuk ka justifikim”, u shpreh ai, duke u treguar i rezervuar për të mos hyrë në polemika të thella. Ndërkohë që Real Madridi synon ruajtjen e ekuilibrit në një edicion ku forma dhe situata e Viniciusit mbeten në qendër të vëmendjes, dalja publike e Mourinhos ka shërbyer si një mbështetje e fortë për lojtarin, duke nxjerrë në pah peshën e presionit me të cilin ai ballafaqohet çdo javë.