Bojkot në Vorë: Tifozët e Tiranës braktisin sfidën me Laçin për t'iu bashkuar protestave

Në stadiumin e Vorës po zhvillohet sfida e vlefshme për javën e 7-të të “Abissnet Superiore” mes Tiranës dhe Laçit, e cila aktualisht mbetet e pandryshuar në shifrat 0-0. Megjithatë, vëmendja në këtë takim është tërhequr nga vendimi i “Tirona Fanatics”, grupit të tifozëve të skuadrës bardheblu, të cilët kanë qëndruar në shkallët e stadiumit vetëm për një kohë shumë të shkurtër, si shenjë reflektimi ndaj protestave që po zhvillohen në kryeqytet prej pesë ditësh. Me anë të një banderole ku lexohej mesazhi “Kur padrejtësia bëhet ligj, rezistenca bëhet detyrim”, ultrasit e Tiranës kanë preferuar të largohen nga përballja futbollistike. Ata kanë zgjedhur t'i bashkohen valës së rezistencës disaditore të studentëve, e cila ka përfshirë tashmë të gjitha qytetet e vendit. Vlen të theksohet se ky nuk është rasti i vetëm në skenën tonë sportive, pasi qëndrime të ngjashme solidarizimi kanë mbajtur edhe grupe të tjera të tifozëve ultras, si “Ultras Guerrils” të Partizanit, “Arrakat Boys” të Elbasanit dhe tifozeria nga Shkodra.