Dritë jeshile për Radion e Policisë, KPM jep autorizimin njëvjeçar për testimin e teknologjisë

Radioja e Policisë së Kosovës është pajisur me një autorizim njëvjeçar që i hap rrugën testimit të teknologjisë dhe shërbimeve të reja. Për mbarëvajtjen e këtij operimi, këtij institucioni i është ndarë frekuenca 92, ndërsa sipas nevojës do të mund të shfrytëzohen edhe frekuenca shtesë. Kjo nismë ka ngritur debate në skenën publike, ku aktorë të ndryshëm kanë shprehur rezerva lidhur me aspektin financiar, ruajtjen e pavarësisë editoriale dhe harmonizimin me standardet ligjore të Bashkimit Evropian. Nga ana tjetër, partia në pushtet ka bërë thirrje që kjo temë të mos politizohet. Kryetari i Komisionit të Pavarur të Mediave (KPM), Besnik Berisha, ka konfirmuar se leja për transmetim është lëshuar për një periudhë prej dymbëdhjetë muajsh, me fokus kryesor provimin e sistemeve teknologjike. Ai ka theksuar se Policia ka ofruar dëshmi konkrete mbi posedimin e kapaciteteve njerëzore për ta jetësuar këtë projekt, kurse alokimi i frekuencave do të bëhet në bashkëpunim të ngushtë me zyrën ekzekutive të KPM-së. “Bazuar në kërkesën e tyre, ata kanë sjellë dëshmitë që kanë kapacitete njerëzore për të kryer këtë punë. Autorizimi është për një vit për të testuar teknologjinë, do t'u jepen frekuenca 92, por sipas nevojës edhe frekuenca të tjera, të cilat në bashkëpunim me zyrën ekzekutive të KPM-së do të alokohen, për qëllime të testimit. Testimi është i rëndësishëm dhe i dobishëm për shoqërinë tonë, ne dëshirojmë që t’i testojmë shërbimet e reja. Si KPM kemi qenë të bindur se është e rëndësishme pjesa e lajmërimeve të trafikut. Me disa hulumtime që kemi bërë ka dalë shpeshherë që ka qenë institucioni më i besueshëm në Kosovë, dhe nuk kemi parë asnjë problem në këtë aspekt”, ka deklaruar Berisha. Në krahun e kundërt, deputetja e Aleancës, Time Kadrijaj, ka ngritur shqetësime serioze rreth këtij projekti, duke vënë në pikëpyetje modelin e funksionimit, mënyrën e financimit dhe rrezikun e ndikimit politik mbi përmbajtjen mediatike. Ajo ka vlerësuar se tregu vendor është i mbuluar mjaftueshëm nga media ekzistuese që trajtojnë edhe temat e sigurisë. Kadrijaj ka kërkuar gjithashtu transparencë se cili institucion do të ushtrojë mbikëqyrje mbi këtë radio, duke shprehur frikën se ajo rrezikon të shndërrohet në një megafon të ekzekutivit. “Unë nuk kam parë një model të funksionimit të radios së policisë, kam shikuar a ka edhe në rajon, askush nuk e ka. Këta të Vetëvendosjes gjithmonë shpikin diçka, ne në Kosovë kemi mjaft media që e mbulojnë çdo sektor, ndoshta pikërisht për shkak të raporteve jo të mira të mediave me Kurtin, ka dashur ta vendosë një si opozitë e mediave tona. Çdo veprim duhet të jetë në vazhdën e asaj, a përputhet me legjislacionin e BE-së një radio e tillë. Nuk e di nga kush do të monitorohet, a do të marrë urdhra nga Ministria e Punëve të Brendshme se çka duhet të lansojë. Nëse do të jetë zgjatje e kësaj qeverie, do të jem kritike dhe nuk do të ndalem. RTK është e vetmja që financohet nga qeveria dhe përballet në vazhdimësi me probleme financiare. Nuk e di se ku po i siguron mjetet për një radio të tillë, apo do t’i bëjë konkurrencë RTK-së”, ka theksuar Kadrijaj. Ndërkaq, shefja e Grupit Parlamentar të Lëvizjes Vetëvendosje, Arbërie Nagavci, e ka përshëndetur këtë hap, duke e konsuar të domosdoshëm për t'i siguruar publikut informacione nga burime kredibile dhe për të luftuar dukurinë e dezinformimit.