Deklaratat e Kurtit ndikuan te dënimet në Hagë, akuza e fortë nga deputeti i AAK-së

Deputeti i Aleancës për Ardhmërinë e Kosovës (AAK), Bekë Berisha, ka hedhur akuza të rënda në drejtim të kryeministrit Albin Kurti, duke e bërë atë përgjegjës për mbajtjen gjallë të temës së Behajdin Allaqit, çështje e cila sipas tij është shfrytëzuar gjatë procesit gjyqësor ndaj ish-krerëve të Ushtrisë Çlirimtare të Kosovës (UÇK) në Hagë. Gjatë një interviste për media, Berisha ka theksuar se si kreu i ekzekutivit ashtu edhe ministri Liburn Aliu e kanë sjellë këtë temë në vëmendje brenda Kuvendit të Kosovës, duke shtuar se nuk ka dëgjuar që ndonjë dëshmitar në gjykatë ta ketë përmendur, por sipas tij, ka qenë pikërisht Kurti ai që e ka riaktualizuar vazhdimisht. Sipas ligjvënësit të AAK-së, këto deklarata publike janë bërë me qëllim të përfitimit politik dhe ngjitjes në pushtet. “Kur e ka lënë Liburn Aliu, prapë e ka përmend Albin Kurti. Ky s’ka qenë dëshmitar okular, por e ka përmend për t’i etiketuar kundërshtarët politikë dhe për të mbërritur në pushtet. Por në fund, ata në Hagë u dënuan me ato deklarata”, u shpreh Berisha. Në përmbyllje të fjalës së tij, deputeti i AAK-së solli në vëmendje edhe gjuhën e përdorur nga trupi gjykues në Dhomat e Specializuara, duke pretenduar se gjatë shpalljes së vendimeve dhe trajtimit të rasteve të vrasjeve, gjyqtari ka përdorur terma me natyrë politike dhe jo thjesht juridike.