Dita e pestë e protestës së studentëve: Kryeministri Rama largohet nga zyra nën masa të rrepta sigurie dhe me praninë e RENEA-s

Studentët kanë zbritur sërish në rrugët e Tiranës këtë të shtunë, duke shënuar ditën e pestë të tubimeve të tyre. Pasi u mblodhën fillimisht përballë Ministrisë së Arsimit, ata pritet të marshojnë sërish nëpër pika kyçe të kryeqytetit, ndërsa thirrjet në rrjetet sociale paralajmërojnë një pjesëmarrje edhe më masive për shkak të mbërritjes së diasporës në vend. Në përgjigje të kësaj situate, autoritetet kanë dislokuar forca të shumta policore rreth Ministrisë së Arsimit dhe institucioneve të tjera qeveritare, përfshirë ndërtesën e Kryeministrisë, e cila mbetet nën vëzhgim të rreptë. Kryeministri Edi Rama ka qëndruar në zyrën e tij deri rreth orës 11:00, kur është larguar prej aty. Pamjet e siguruara nga terreni dokumentojnë momentin e nisjes së automjetit të tij, i cili është shoqëruar nga eskorta e zakonshme e Gardës së Republikës dhe njësitë e Policisë së Shtetit përgjatë bulevardit kryesor, drejt banesës së tij në Surrel. Ajo që ka rënë në sy gjatë lëvizjes së sotme është angazhimi shtesë i një njësie të Forcave Speciale RENEA. Furgoni i kësaj njësie ka lëvizur paralelisht me mjetet e tjera të eskortës, duke reflektuar një nivel më të lartë gatishmërie dhe mbrojtjeje për kreun e qeverisë.