Flick tregon dilemën te Barcelona: Si do të menaxhohet minuti i Lamine Yamalit?

Strategu i Barcelonës, Hansi Flick, ka pranuar hapur se aktivizimi i Lamine Yamalit kërkon një kujdes të veçantë dhe maturi, ndonëse nuk dëshiron të ndalojë hovin dhe formën e jashtëzakonshme që po kalon sulmuesi spanjoll. Tekniku gjerman e ka vlerësuar lart talentin e ri, duke bërë të qartë se krahas ruajtjes së ekuilibrit fizik dhe dozimit të ngarkesës, primare mbetet që lojtari të vazhdojë të argëtohet në fushën e gjelbër. “Nuk është e lehtë t’i përgjigjem kësaj pyetjeje, sepse Lamine është një lojtar i jashtëzakonshëm. Jam plotësisht i vetëdijshëm se duhet t’i menaxhojmë me kujdes minutat e tij, por gjëja më e rëndësishme për të është që ta shijojë futbollin”, ka deklaruar Flick. “Për këtë arsye, nuk dua ta ndal këtë dinamikë pozitive në të cilën ndodhet, edhe pse jam i vetëdijshëm se duhet t’i menaxhojmë minutat dhe të ruajmë ekuilibrin e tij fizik”, ka shtuar ai më tej. Klubi katalanas synon të përfitojë maksimalisht nga momenti i artë i 18-vjeçarit, por në të njëjtën kohë mbetet i kujdesshëm për të parandaluar çdo rrezik të mundshëm të mbingarkesës, me qëllim që ylli i skuadrës të ruajë formën optimale gjatë gjithë ecurisë sezonale.