“Jemi në luftë me shtetin tonë” – Fjalimi prekës i 16-vjeçarit para Ministrisë së Arsimit

Protesta e studentëve dhe të rinjve ka sjellë në vëmendje një zë ndryshe, atë të një 16-vjeçari, i cili ka mbajtur një fjalim të fuqishëm përpara godinës së Ministrisë së Arsimit. Gjatë fjalës së tij, ai u është drejtuar efektivëve të rendit me thirrjen për të reflektuar mbi fatin e gjeneratës së re dhe për të shmangur çdo formë dhune ndaj protestuesve. I mituri ka treguar se është i pranishëm në shesh çdo ditë, i shtyrë nga dëshira për të siguruar një standard më të mirë jetese dhe një të ardhme të sigurt në vend. Edhe pse ai vetë nuk ka qenë viktimë e dhunës policore, 16-vjeçari ka ngritur shqetësimin se disa prej bashkëmoshatarëve të tij janë shoqëruar dhe mbajtur në ambientet e komisariatit për një kohë më të gjatë sesa parashikojnë rregullat, sipas pretendimeve të tij. Duke vënë theksin te fakti se bëhet fjalë për fëmijë dhe të mitur, ai ka zbuluar gjithashtu se në fillim prindërit e tij kanë qenë kundër pjesëmarrjes së tij në këto tubime publike.