Hykmete Bajrami: Paga e 13-të për administratën, ndërsa sektorit privat i mohohet edhe minimumi ligjor

Deputetja e Lidhjes Demokratike të Kosovës, Hykmete Bajrami, ka ngritur shqetësimin e saj në lidhje me bojkotin e punës nga ana e stafit teknik në institucionet arsimore, duke vënë në shënjestër të kritikave dështimin e zbatimit të pagës minimale për të punësuarit në sektorin privat. Përmes një reagimi të shpërndarë në rrjetet sociale, ajo ka vënë theksin te fakti se mirëmbajtësit e shkollave, të angazhuar përmes operatorëve ekonomikë privatë të kontraktuar nga pushteti lokal, vazhdojnë të marrin një shpërblim mujor prej vetëm 390 eurosh, pavarësisht faktit se pragun e ri të pagës minimale prej 500 eurove bruto ka hyrë zyrtarisht në fuqi që nga data 1 korrik 2026. Në këtë kuadër, ligjvënësja e opozitës i ka bërë thirrje urgjente Inspektoratit Qendror të Punës që të ndërmarrë hapa konkretë ndëshkues ndaj atyre subjekteve private që po shkelin ligjin duke mos e zbatuar këtë vendim. “Nëse kompanitë nuk i përballojnë kostot shtesë nga vendimi i Qeverisë, zgjidhjen duhet ta kërkojnë te kontraktori i tyre përmes ndryshimit të kontratave, POR problemet kontraktuale asnjëherë nuk duhet të zgjidhen në kurriz të punëtorëve dhe këtë situatë s’duhet ta lejoj Inspektorati”, u shpreh Bajrami. Më tej, zyrtarja e LDK-së ka drejtuar akuza të ashpra edhe ndaj pabarazisë së theksuar në trajtimin financiar mes punonjësve të administratës shtetërore dhe atyre të sektorit privat, duke sjellë në vëmendje ndarjen e rreth 130 milionë eurove përmes rishikimit buxhetor për mbulimin e pagës së 13-të në aparatin shtetëror. “Qeveria ka ndarë rreth 130 milionë euro për pagën e 13-të, për sektorin publik,(përmes rishikimit të buxhetit) ndërkohë punëtorët që mbajnë të pastra shkollat e fëmijëve tanë nuk marrin as pagën minimale. Qeveria duhet të sigurojë zbatimin e vendimeve të veta, komunat duhet të marrin përgjegjësi për kontratat e tyre, ndërsa kompanitë private duhet t’i respektojnë të drejtat e punëtorëve. Paga minimale nuk është privilegj as opsion, është detyrim ligjor dhe duhet të zbatohet nga të gjithë”, përfundoi ajo.