Alarm në disa rajone të Rusisë: Ujqërit e egër mësyjnë zonat e banuara dhe sulmojnë qytetarët

Paniku ka kapluar disa rajone të Rusisë, ku prania e ujqërve të egër pranë lagjeve të banuara po bëhet gjithnjë e më shqetësuese për sigurinë e qytetarëve dhe të kafshëve shtëpiake. Që nga nisja e stinës së vjeshtës, vetëm në rrethinën e Moskës janë dokumentuar së paku 10 raste të shfaqjes së këtyre grabitqarëve, ndërsa incidente të ngjashme po raportohen me të madhe edhe në vise të tjera të vendit. Sipas mediatizimeve vendase, prania e ujqërve është regjistruar konkretisht në rrethet Taldom, Dmitrov, Serpukhov dhe Satura. Timur Usmanov, përfaqësues nga Shoqëria Gjithë-Ruse për Mbrojtjen e Natyrës, konfirmoi rritjen e dukshme të thirrjeve nga banorët e alarmuar që vërejnë egërsirat pranë shtëpive të tyre. Situatë kritike është shënuar gjithashtu në rajonet e Leningradit, Tyumenit, Sverdlovskit dhe Transbaikalias. Në këtë të fundit ndodhi edhe një përleshje e dëshpëruar: një ujk e sulmoi një burrë jashtë shtëpisë së tij duke e kafshuar në dorë, mirëpo qytetari arriti të mbrohej dhe e mbyti kafshën me një thikë. Ngjarje të tjera drithëruese janë regjistruar edhe në rrethin Gatchina të rajonit të Leningradit, ku një grua u detyrua të vraponte për të shpëtuar jetën pasi u ndoq nga një ujk gjatë shëtitjes me qenin e saj. Ndërkohë, në distriktin Starominsky të rajonit të Kubanit, tufa grabitqarësh kanë sulmuar bagëtinë e fermerëve, kurse në qytetin Aramil të Sverdlovskit ujqërit janë parë duke lëvizur pranë ndërtesave të banimit. Specialistët e faunës sqarojnë se kjo dyndje lidhet me kërkimin e ushqimit, meqenëse zonat e populluara ofrojnë pre më të lehtë për ta. Sa i përket shkaqeve, Komiteti i Jetës së Egër në rajonin e Leningradit thekson se ujqërit e rritur po trajnojnë të vegjlit e tyre për gjueti, duke i afruar ata gjithnjë e më shumë me rrugët kryesore dhe qendrat e banuara. Për këtë arsye, autoritetet u kanë bërë thirrje banorëve të tregojnë vigjilencë të shtuar dhe t'i mbajnë kafshët shtëpiake në ambiente të mbyllura e të sigurta. Një rrezik të drejtpërdrejtë e përbejnë veçanërisht qentë e lidhur me zinxhir në oborr. Po ashtu, apelohet që mbetjet ushqimore të sigurohen me kujdes për të mos tërhequr egërsirat pranë banesave. Sidoqoftë, ndonëse rastet e pranisë së ujqërve pranë shtëpive janë shumuar, zyrtarët nuk konfirmojnë ndonjë rritje të përgjithshme të popullatës së tyre në territorin rus, por e ndërlidhin këtë me ndryshimet sezonale të lëvizjes së presë dhe procesin e edukimit të këlyshëve. Nëse qytetarët përballen papritur me një ujk, ekspertët këshillojnë kategorikisht të mos vrapohet dhe të mos i kthhet shpina kafshës. Reagimi më i mirë është tërhiqja e ngadaltë, ngritja e zërit për t'u dukur më kërcënues dhe përdorimi i çdo sendi rrethanor për vetëmbrojtje nëse kafsha bëhet agresive.