U paraqit rrejshëm si toger policie për t’i marrë 450 euro një gruaje: Prangoset i dyshuari në Fushë Kosovë

Një person është prangosur nga organet e rendit në Fushë Kosovë, i dyshuar për mashtrim dhe përvetësim të kundërligjshëm të të hollave. I dyshuari pretendohet se u shfaq përmes telefonit si toger i Policisë së Kosovës dhe arriti t'i merrte 450 euro një qytetareje, me arsyetimin e rremë se paratë nevojiteshin për blerjen e lëndës djegëse (pelet). Sipas të dhënave zyrtare të rendit publik, ngjarja ka ndodhur në rrugën “Dardania” në Fushë Kosovë, ndërsa u denoncua nga e dëmtuara më 16 tetor. Gruaja ka deklaruar para hetuesve se personi në fjalë e kishte kontaktuar në telefon dhe, duke shfrytëzuar gradën e rreme zyrtare, i kishte kërkuar t'ia dorëzonte atij shumën e caktuar monetare. E vënë në lajthitje nga prezantimi i tij si pjestar i policisë, viktima ia dorëzoi paratë të dyshuarit, i cili menjëherë pas kësaj u largua në drejtim të panjohur me një veturë. Hetimet e mëtejshme zbuluan se automjeti me të cilin lëvizte i dyshuari ishte marrë me qira disa ditë më parë në Gjilan dhe nuk i ishte kthyer më pronarit legjitim, duke u keqpërdorur gjatë kësaj periudhe. Kërkimet e njësitit policor rezultuan me sukses, duke bërë të mundur identifikimin, lokalizimin dhe arrestimin e të dyshuarit së bashku me veturën e marrë me qira. Me vendim të prokurorit të çështjes, i arrestuari është dërguar në mbajtje për procedim të mëtejshëm ligjor.