Vala e protestave në Shqipëri, Luiz Ejlli: Zëri i qytetarëve po shpërfillet hapur nga qeveria

I ftuar mbrëmjen e sotme në emisionin “Top Story” me moderatore Grida Dumën, fituesi dhe drejtuesi i formatit “Live me Luizin”, Luiz Ejlli, ka komentuar situatën e tensionuar dhe protestat që kanë pushtuar vendit ditët e fundit. Gjatë bisedës, ai theksoi se incidentet e izoluara nuk duhet të shërbejnë si mbulesë për të zhvlerësuar shkaqet e vërteta të kësaj pakënaqësie popullore. Duke shpjeguar arsyet e pezullimit të programit të tij, Ejlli u shpreh se në rrethana të tilla, argëtimi dhe muzika nuk gjejnë vend. Sipas tij, fokusi te dëmtimet materiale, si djegia e kazanëve apo dëmtimi i semaforëve, përbën një shmangje të qëllimshme nga problemi thelbësor që ka nxjerrë qytetarët në rrugë. “Ata njerëz janë plot halle dhe shteti duhet t’i thirrë dhe të përpiqet të flasë dhe t’i zgjidhë problemet. Jo t’i kërkojë llogari se kush ju ka sjellë këtu,” u shpreh ai gj={`atë`} transmetimit, duke shtuar se protesta fillestare paqësore përbënte një model qytetarie që u prit vetëm me heshtje dhe mospërfillje. Më tej, Ejlli solli në vëmendje ngjarjet e rënda të së kaluarës, si ato të vitit 1997 dhe 21 janarit 2011, duke theksuar se nuk dëshiron të krijojë paralele se pushtetet vijnë apo ikin përmes gjakderdhjes. Duke shtuar se ka miq brenda radhëve të policisë, ai e ka cilësuar të paimagjinueshëm që efektivët të ushtrojnë dhunë ndaj të rinjve pa asnjë shkak. Në përmbyllje të fjalës së tij, kantautori i njohur ngriti alarmin se populli po trajtohet me indiferencë totale, ndërsa ligjvënësit dhe anëtarët e kabinetit qeveritar janë udhëzuar të heshtin. Ai kritikoi gjithashtu mungesën e një reagimi institucional nga ana e Presidentit, duke nënvizuar se problemet e mëdha nuk zgjidhen me statuse në rrjetet sociale, por me veprime konkrete. Në lidhje me pjesëmarrjen e të rinjve, Ejlli sqaroi se ata detyrohen të mbulojnë fytyrat për shkak të frikës se familjarët e tyre mund të përballen me presione dhe kërcënime në vendet e punës.