Komandanti i ri amerikan në KFOR: Të përkushtuar për siguri dhe bashkëpunim të ngushtë me aleatët e NATO-s në Kosovë

Koloneli amerikan Jabari Miller, i cili tashmë ka marrë drejtimin e Komandës Rajonale-Lindje të misionit paqeruajtës të KFOR-it, ka theksuar se trupat amerikane janë plotësisht të gatshme të bashkëpunojnë ngushtë me partnerët e aleancës për të siguruar një ambient të qetë dhe stabil në vend. Duke folur për revistën ushtarake “Stripes”, komandanti i ri u shpreh se personeli ushtarak është në gjendje të shkallës më të lartë të gatishmërisë. “Ushtarët tanë janë në formë të mirë fizike, të motivuar, të disiplinuar, të trajnuar dhe të gatshëm të punojnë së bashku me aleatët dhe partnerët tanë të NATO-s për të ruajtur një mjedis të sigurt dhe të qëndrueshëm në Kosovë”, u shpreh ai. Ky angazhim vjen menjëherë pas marrjes së kësaj detyre të rëndësishme nga pjesëtarët e Regjimentit të Dytë të Kalorësisë dhe njësive mbështetëse të Divizionit të Parë të Këmbësorisë, të cilët e kanë selinë e tyre në Gjermani. Ceremonia zyrtare e dorëzimit të detyrës u zhvillua të hënën në kampin Bondsteel në Kosovë, bazuar në njoftimin zyrtar të lëshuar nga Ushtria Amerikane për Evropën dhe Afrikën. Në këtë mision, trupat në detyrë aktive e kanë marrë udhëheqjen nga Brigada e 53-të e Këmbësorisë e Gardës Kombëtare të Floridës. Ky hap shënon një zhvillim të rëndësishëm, pasi për herë të parë që nga shtatori i vitit 2014, në krye të kësaj komande rikthehen ushtarët amerikanë në detyrë aktive. Ndërkaq, rreshteri i shtabit Hunter Tate, në cilësinë e zëdhënësit të komandës, ka shpjeguar se ky rotacion i udhëheqjes është ndërmarrë duke u bazuar te “disponueshmëria aktuale e forcave dhe nevojave të misionit”.