Krisja e re Uashington-Kiev: Donald Trump vlerëson se është më sfiduese të bashkëpunosh me Volodymyr Zelenskyn sesa me Vladimir Putinin

Ndërsa tensionet mes Uashingtonit dhe Kievit kanë arritur një pikë kulmore, presidenti ukrainas po kërkon intensivisht mbështetjen e partnerëve evropianë, në kuadër të samitit të Bashkimit Evropian që po zhvillohet në Bruksel. Gjatë kësaj vizite, Zelensky zhvilloi bisedime me sekretarin e përgjithshëm të NATO-s, Mark Rutte, si dhe një sërë takimesh dypalëshe me krerët e shteteve të BE-së. “Të gjithë ne në Evropë duam që kjo luftë të përfundojë. Dhe që kjo të ndodhë, nevojiten sinjale të forta, më shumë presion real ndaj Rusisë dhe më shumë mbështetje mbrojtëse për Ukrainën”, deklaroi Zelensky, duke nënvizuar se uniteti i aleatëve është jetik në këtë periudhë për të garantuar sigurinë e popullsisë civile ukrainase. Këto zhvillime vijnë pasi udhëheqësi në Kiev bëri të ditur se autoritetet ukrainase nuk do t'i përmbahen më kërkesave të administratës amerikane për të frenuar sulmet ndaj infrastrukturës energjetike ruse. Ftohja e marrëdhënieve u thellua javën e kaluar, pasi Trump njoftoi se ka ndërmend të lehtësojë sanksionet ndaj Moskës në këmbim të furnizimit të tregjeve ndërkombëtare me vëllime të mëdha nafte. Pakënaqësitë në Ukrainë janë përshkallëzuar edhe më tej pas ndërprerjes së funksionimit të sistemit kyç satelitor të mbështetur nga Shtetet e Bashkuara, një zhvillim që ka kufizuar ndjeshëm kapacitetet mbrojtëse të ushtrisë ukrainase përballë ofensivës ruse. Nga ana e tij, presidenti amerikan i ka cilësuar të papranueshme sulmet e rinovuara ndaj rafinerive ruse, duke e fajësuar Kievin se po ndikon negativisht në rritjen e tarifave globale të energjisë. “Është më e vështirë të punosh më Zelenskyn sesa me Putinin”, u shpreh Trump, duke shtuar se kreu i shtetit ukrainas nuk po tregon vullnet real për arritjen e një kompromisi. “Ai thotë se po, por në realitet nuk po e bën”, shtoi lideri i Shtëpisë së Bardhë. Këto deklarata pasuan një sulm me dronë të Ukrainës në një rafineri në rajonin rus të Ryazanit, që shënon goditjen e parë të këtij lloji që prej deklaratës së Trump të dielën, ku pretendonte se Moska dhe Kievi kishin rënë dakord për një armëpushim në sektorin energjetik.