Ndërhyrja e policisë ndaj studentëve, pedagogu Klementin Mile: Veprimet ishin plotësisht barbara dhe joprofesionale

Pedagogu Klementin Mile, i ftuar në emisionin “Zonë e Lirë” në News24, ka adresuar zhvillimet e fundit rreth protestës së studentëve që po mbahet prej katër ditësh në vend, duke vënë theksin te përdorimi i dhunës nga ana e forcave të rendit ndaj të rinjve dhe gjimnazistëve. Gjatë prononcimit të tij, Mile e ka cilësuar sjelljen e efektivëve si plotësisht jashtë çdo standardi profesional, duke dënuar ashpër përdorimin e forcës fizike ndaj protestuesve të moshës së re gjatë tubimeve. Ai veçoi një episod konkret gjatë ndërhyrjes, ku një i ri u rrëzua në tokë dhe u godit nga efektivët e policisë, duke ngritur shqetësime serioze lidhur me qasjen dhe mënyrën se si strukturat e rendit po e menaxhojnë këtë situatë. “Policia nuk është treguar aspak profesionale. Pati teprime të dukshme me dhunën. E rrëzuan të riun, por çfarë është ai, armik? Përtej mungesës së sjelljes profesionale, polici nuk u mjaftua vetëm me shtyrjen, por e ka goditur atë. Është komplet barbare”, u shpreh Mile gjatë transmetimit në News24. Këto deklarata vijnë në një periudhë kur publikimi i pamjeve filmike nga ndërhyrjet e policisë ndaj protestuesve të rinj ka shkaktuar një valë reagimesh dhe debatesh publike mbi mënyrën e trajtimit dhe menaxhimit të tubimeve studentore.