Goditje për Interin, mbrojtësi Benjamin Pavard lëndohet dhe mbetet jashtë fushave

Klubi i Interit ka pranuar një tjetër lajm shqetësues në lidhje me organikën e skuadrës dhe gjendjen fizike të lojtarëve të tij. Pas kapitenit Lautaro Martinez, reparti i të dëmtuarve është pasuruar edhe me emrin e mbrojtësit Benjamin Pavard, i cili do t'i duhet t'i nënshtrohet një periudhe rikuperimi. Sipas njoftimit zyrtar nga kampi zikaltër, kontrollet mjekësore të kryera kanë konfirmuar një dëmtim muskulor në aduktorët e kofshës së djathtë për mbrojtësin e njohur francez. Parashikohet që Pavard të mungojë në fusha për afro 20 ditë, ndërsa synimi kryesor mbetet rikthimi i tij në fushë në kohë për sfidën kundër Comos, e cila është caktuar të luhet më 8 nëntor, pak përpara ndërprerjes së kampionatit për shkak të angazhimeve të kombëtareve. Kjo mungesë e papritur përbën një sfidë më vete për trajnerin e Interit, Cristian Chivu, i cili tashmë do të ketë hapësira më të ngushta për të bërë rotacione në formacionin e tij. Në ndeshjen e kaluar ndaj Bolognës, lojtari ishte planifikuar ta niste sfidën që nga minuta e parë, por ky problem fizik ka prishur të gjitha skenarët taktikë të teknikut rumun. Për të mbuluar këtë boshllëk në repartin e prapavijës, gjatë kësaj kohe treshja e mbrojtjes te zikaltrit pritet të formohet nga Yann Bisseck, Manuel Akanji dhe Alessandro Bastoni, ku gjithashtu llogaritet edhe Carlos Augusto si alternativë e vlefshme për mbrojtjen.