Forma e shkëlqyer e Teutës vazhdon, Tetova zbulon çelësin e suksesit ndaj Dinamos

Formacioni i Teutës po kalon një periudhë fantastike në këtë edicion të Abissnet Superiore, duke mos e ulur ritmin. Skuadra nga Durrësi ka shfaqur një epërsi të plotë përballë Dinamos, jo vetëm në shifrat përfundimtare, por edhe në rrjedhën e lojës dhe rrezikshmërinë e krijuar drejt kuadrove kundërshtare. Falë këtij suksesi, djemtë e detit kanë konsoliduar pozitat në krye të renditjes me 19 pikë të grumbulluara pas 7 javësh, ku regjistrojnë një ecuri mbresëlënëse prej 6 fitoresh radhazi dhe vetëm 1 barazimi. Në përfundim të sfidës, trajneri Edlir Tetova ka ndarë përshtypjet e tij për gazetarët. "Kemi marrë tri pikë që na japin kënaqësi. Edhe pse nuk zhvilluam ndeshjen tonë më të mirë, arritëm të sigurojmë fitoren. Kemi pikën tonë të fortë në të djathtë, por Dinamo ishte përgatitur dhe i kishte marrë masat e duhura. Zhvendosja e Malës ishte e mirëmenduar. Lëvizjet tona i kishim përqendruar në krahun e djathtë dhe nuk kemi pse ta fshehim këtë", u shpreh fillimisht tekniku i durrsakëve. Më tej, ai shtoi se presingu i lartë i ushtruar nga skuadra ua vështirësoi kundërshtarëve daljen në atë krah. "Më pas ndryshuam taktikë duke kaluar Malën në të majtë, një lëvizje që solli efekt dhe funksionoi te goli i shënuar nga Pedro", u shpreh Tetova. Duke analizuar pjesën e dytë, trajneri theksoi se linja e djathtë nisi të prodhonte rrezikshmëri me depërtimet e saj, ku u shënua edhe goli nga Toli. “Patëm një periudhë prej 15 minutash ku Dinamo na detyroi të mbrohemi pranë portës sonë. Edhe zëvendësimet ishin të kushtëzuar. Për më tepër, në fraksionin e dytë të lojës nuk mbeta plotësisht i kënaqur me mbrojtjen e ulët, e cila nuk përkonte me atë çfarë kishim përgatitur gjatë javës”, përfundoi ai.