Tensione dhe përleshje para Kryeministrisë: Gurë, gaz lotsjellës dhe ndërhyrje me ujë me piper

Protestat e dhunshme në kryeqytet kanë hyrë në ditën e tyre të katërt. Megjithatë, duke u ndikuar mbase nga lodhja e tubimeve të njëpasnjëshme deri në orët e vona të natës, tubimi i sotëm nisi me një ritëm më të ngadaltë dhe më të qetë. Pas një marshimi nëpër arteriet e Tiranës, turma u tubua fillimisht përpara Ministrisë së Arsimit. Aty u prit nga drejtuesi i Forcave të Ndërhyrjes së Shpejtë (FNSH) për Tiranën, i cili u bëri thirrje protestuesve që të shmangin sulmet ndaj efektivëve, duke theksuar se misioni i tyre është garantimi i sigurisë së institucioneve. Ndërkohë, në Rrugën e Durrësit, strukturat e rendit kishin pozicionuar forca të shumta në pika strategjike, duke penguar çdo mundësi të protestuesve për të depërtuar dhe për të ngritur nivelet e tensionit në atë zonë. Pas rreth dy orësh qëndrimi para Ministrisë së Arsimit – kohë gjatë së cilës pati fërkime me hedhje gurësh nga njëra anë dhe përdorim të gazit lotsjellës e ujit me piper nga ana tjetër – pjesëmarrësit vendosën të drejtohen drejt ndërtesës së Kryeministrisë, ku gjithashtu u ndeshën me kordonë të dendur policorë. Në fazën e parë, një grup të rinjsh shënjestroi godinën e Kryesisë së Kuvendit, duke dëmtuar grilat e saj. Më pas, ata shkatërruan pllakat e trotuarit dhe përdorën gurët e shkëputur për të sulmuar efektivët e policisë. Forcat e rendit kishin ndryshuar qasje taktike, duke shmangur ekspozimin e drejtpërdrejtë. Të vendosur pas autobotëve, përmes gazit lotsjellës dhe ujit me piper, ata aplikuan strategjinë e avancimit të matur “dy hapa para, një hap pas” për të zmbrapsur turmën. Kjo taktikë e solli efektin e saj duke i tërhequr protestuesit deri në afërsi të Parkut Rinia, gjë që nxiti një reagim edhe më agresiv nga ana e tyre. Të irrituar, ata nisën të sulmonin godinën e ish-hotel “Dajtit”, duke shkatërruar çdo gjë që i dilte përpara dhe duke i vënë flakën koshave të mbeturinave. Gjatë gjithë zhvillimit të protestës u regjistruan disa incidente të rënda. Një e re u plagos në kokë nga një granatë gazi lotsjellës, ndërsa një tjetër protestues u dhunua fizikisht nga disa efektivë pranë zonës së Piramidës. Për ndihmë mjekësore në spital u paraqitën gjithashtu disa të mitur dhe pjesëtarë të forcave policore.