Tensioni kulmon në Tiranë: Skenat e protestave pushtojnë faqet e mediave më të rëndësishme botërore

Kryeqyteti shqiptar po përballet prej katër ditësh me një valë protestash të dhunshme dhe përplasjesh të ashpra, të cilat kanë tërhequr vëmendjen e opinionit ndërkombëtar. Qytetarë të shumtë, të udhëhequr nga të rinjtë, kanë bllukuar akse rrugore, kanë sulmuar institucione shtetërore, banka dhe biznese private, duke shkatërruar gjithashtu stola, kioska dhe kosha mbeturinash nëpër rrugë. Gazeta e njohur “New York Times” i ka kushtuar një hapësirë të gjerë zhvillimeve në Tiranë, duke theksuar se zemërimi popullor është ndezur nga shpenzimet e larta të shkollimit, korrupsioni galopant, shtrenjtimi i jetesës dhe pakënaqësia e thellë lidhur me një projekt turistik luksoz në jug të vendit. Sipas këtij mediumi, mijëra studentë dhe banorë kanë paralizuar Tiranën përmes ngritjes së barrikadave me kangjella hekuri dhe ndezjes së zjarreve, ndërkohë që kërkojnë hapur dorëheqjen e kryeministrit Edi Rama. Lëvizja e cila fillimisht lindi si një kauzë kundër projekteve luksoze në jug, ka degjeneruar në përleshje fizike me strukturat e rendit. Turmat e protestuesve marshuan drejt selisë së qeverisë dhe dikasterit të arsimit, ku pati hedhje gurësh ndaj ndërtesave zyrtare dhe bankomateve, ndërsa situata vijon të mbetet tejet e tensionuar, raporton “New York Times”. Anila Shehu, studente e vitit të tretë në inxhinieri, u shpreh për gazetën se populli ka muaj që proteston për shkarkimin e kreut të qeverisë, por zëri i tyre ka rënë në vesh të shurdhër. “Për këtë arsye, do të vazhdojmë të protestojmë me çdo mjet dhe në çdo mënyrë të mundshme, derisa Rama të japë dorëheqjen. Mjaft është mjaft”, u shpreh ajo. Nga ana e tij, Emir Lecini, një nga organizatorët e lëvizjes studentore, pranoi se situata ka dalë jashtë kontrollit, sidomos pas bashkimit të protestave me tifozë futbolli dhe shtresa të tjera të pakënaqura shoqërore, duke rikonfirmuar se kërkesa e vetme mbetet largimi i kryeministrit. Edhe agjencia prestigjioze britanike “The Guardian” ka sjellë në vëmendje ngjarjet në Tiranë, duke publikuar detaje dhe materiale vizuale edhe në rrjetin social “Instagram”. Artistja dhe aktivistja Mei Seva, e cila ka muaj që merr pjesë në tubime, deklaroi për “The Guardian”: “Ne po protestojmë për një Shqipëri të Re, një Shqipëri demokratike dhe evropiane, ku qytetari i zakonshëm ka të njëjtat të drejta dhe të njëjtat mundësi si të pasurit dhe të fuqishmit”. Në shkrimin e saj, “The Guardian” nënvizon se dhjetëra mijëra studentë kanë mbushur rrugët, ndërsa tubimet janë shndërruar në përleshje të egra me policinë, e cila është kundërpërgjigjur me gaz lotsjellës dhe autobote uji. Gjatë trazirave janë regjistruar dëme të rënda, përfshirë zjarrvënie në një objekt qeveritar dhe dy banka, si dhe shkatërrim të vitrinave të dyqaneve lokale dhe përmbysje të kontejnerëve të mbetjeve.