Nisje e mbarë për Shqipërinë, Ismajli: Dominim total dhe tre pikë të merituara

Kombëtarja shqiptare e futbollit e ka nisur me sukses rrugëtimin e saj në Ligën e Kombeve, duke triumfuar ndaj Bjellorusisë me rezultatin 2-0 në stadiumin “Air Albania”. Një fitore kjo që rikthen moralin në radhët e kuqezinjve pas rezultateve jo të favorshme në ndeshjet miqësore të muajit qershor. Pas përfundimit të sfidës, mbrojtësi Ardian Ismajli nuk e ka fshehur entuziazmin për paraqitjen e ekipit. Ai ka theksuar rëndësinë e këtij trepikëshi për ecurinë e mëtejshme të përfaqësueses sonë. “Ishte thelbësore ta nisnim me fitore pas zhgënjimeve të qershorit. E kemi kontrolluar lojën plotësisht dhe, ndonëse mund të kishim shënuar më shumë, ajo që vlen është se e nisëm mbarë. Përshtypjet sot janë shumë pozitive dhe skuadra po ambientohet gjithnjë e më mirë me sistemin e ri taktik. Shpresojmë që kjo të na lehtësojë rrugën drejt kualifikimit për në Europian”, deklaroi Ismajli. Duke komentuar qasjen e kundërshtarit, mbrojtësi kuqezi pranoi se presioni i Bjellorusisë në fillim ishte i papritur, por përvoja e lojtarëve në kampionatet elitare, siç është Seria A, ka qenë vendimtare për menaxhimin e situatës. “Nuk e prisnim atë presion nga Bjellorusia, megjithatë përvoja jonë e gjatë në Itali na ka mësuar si të mbrohemi dhe, pas atyre minutave, e morëm plotësisht lojën nën kontroll”, përfundoi ai.