Moti për të premten: Vranësira, reshje shiu e bore dhe ulje e temperaturave deri në 15°C

Për ditën e nesërme, e premte, vendi ynë parashikohet të përfshihet nga kushte atmosferike të paqëndrueshme, ku do të mbajë mot i vranët, por do të ketë edhe intervale me diell. Gjatë kësaj kohe, në zonat e ulëta priten reshje lokale shiu, ndërsa në rajonet malore do të ketë reshje bore, të cilat mund të krijojnë shtresa të reja dëbore. Po ashtu, nuk përjashtohet mundësia që lokalisht të ketë shkarkime rrufesh dhe bubullima. Sa i përket erës, ajo do të fryjë nga drejtimi i veriut dhe verilindjes, duke qenë herë pas here e fuqishme, me shpejtësi që do të lëvizë nga 15 deri në 46 kilometra në orë. Temperaturat do të shënojnë rënie krahasuar me ditët e kaluara. Vlerat minimale do të zbresin nga 4 deri në 7 gradë Celsius, ndërkohë që temperaturat maksimale gjatë ditës do të arrijnë deri në 15 gradë Celsius.