Hajduku i Splitit nis me fitore Ligën e Konferencës ndaj Ajaxit, tensionet e tifozëve rrezikojnë ndërprerjen e sfidës

Hajduku i Splitit e ka nisur me këmbë të mbarë rrugëtimin e tij në Ligën e Konferencës, pasi ka triumfuar me rezultatin 2:1 ndaj gjigantit holandez, Ajax, në një përballje të zjarrtë të zhvilluar në stadiumin “Polud”. Megjithatë, përveç ngjarjeve në fushën e blertë, vëmendja u zu edhe nga sjellja e tifozëve vendës, grupi i njohur ‘Torcida’, veprimet e të cilëve detyruan gjyqtarin që ta ndërpriste takimin për afro 12 minuta. Sfida nisi me një mundësi të mirë për skuadrën e Ajaxit në minutën e shtatë, por më pas skuadra nga Spliti mori frerët e lojës në dorë dhe filloi të rrezikonte seriozisht portën kundërshtare. Avantazhi i kroatëve u materializua në minutën e 37-të. Marin Shotiçek përfitoi nga një top i fituar ndaj Davy Klaassenit dhe organizoi një kundërsulm vrastar, duke shërbyer më pas saktësisht për Bamba Sanyangun, i cili zhbllokoi shifrat duke shënuar për 1:0. Holandezët reaguan në pjesën e dytë, duke barazuar rezultatin në minutën e 53-të, kur Thilo Kehrer dhuroi një asist për Davy Klaassenin, i cili nuk gaboi për ta dërguar topin në rrjetë dhe për të vendosur ekuilibrin 1:1. Gëzimi i Ajaxit zgjati shumë pak, pasi vetëm tri minuta më vonë Hajduku riktheu epërsinë. Pas një gabimi në pasim nga Torrents, Shego rikuperoi një top të rëndësishëm dhe asistoi te Shotiçek, i cili u tregua i saktë për 2:1. Në minutën e 78-të, arbitri kryesor u detyrua të ndërpriste ndeshjen për shkak të tymit të dendur dhe mjegullës së krijuar nga mjetet piroteknike të hedhura nga tribuna e rezervuar për ‘Torcidën’. Në përputhje të plotë me rregulloren dhe protokollin e UEFA-s, lojtarët u larguan përkohësisht drejt dhomave të zhveshjes. Përmes sistemit të altoparlantëve, tifozët u paralajmëruan qartë se çdo përsëritje e sjelljeve të tilla do të sillte ndërprerjen përfundimtare të ndeshjes. Pas një ndërprerjeje prej 12 minutash, ndeshja u rinis rregullisht. Menjëherë pas rikthimit në fushë, Ajaxi qëlloji traversën, ndërsa në minutat e mbetura ushtroi trysni të madhe në kërkim të golit të barazimit. Pavarësisht presionit, prapavija e Hajdukut rezistoi me sukses deri në sekondat e fundit, duke i siguruar skuadrës kroate një fitore tepër të rëndësishme me rezultatin 2:1.