Protestat në Prishtinë: Fahri Fazliu i Ri kërkon drejtësi dhe dinjitet për ish-krerët e UÇK-së

Në natën e njëmbëdhjetë të tubimit protestues në kryeqytetin e Kosovës, drejtuar kundër vendimeve të Gjykatës Speciale për ish-drejtuesit e Ushtrisë Çlirimtare të Kosovës, ka mbajtur fjalimin e tij Fahri Fazliu i Ri, nipi i dëshmorit të atdheut Fahri Fazliu. Gjatë fjalës së mbajtur para qytetarëve, ai ka evokuar kujtimet e lidhjes së tij të gjakut me heroin e kombit, Fahri Fazliu, duke sjellë në vëmendje historikun e gjatë të sakrificave të familjes ndër dekada. “Unë jam Fahri Fazliu i ri. E mbaj me krenari emrin e xhaxhait tim, heroit të kombit, Fahri Fazliu. I cili ra në një betejë me forcat jugosllave-serbe në nëntor të vitit 1989, së bashku me shokun e tij të idealit, heroin e kombit Afrim Zhitia. Jam djali i veprimtarit të çështjes kombëtare dhe luftëtarit të UÇK-së, Fadil Fazliu, dhe nipi i dy dëshmorëve të Kosovës, Fahri e Bahri Fazliu”, u shpreh Fazliu. Më tej, ai është ndalur te pesha e rëndë morale që mbart mbi supe trashëgimia e familjes së tij në shërbim të atdheut. “E mbaj me krenari emrin e familjes sime, por edhe peshën e madhe të sakrificës që ajo ka bërë ndër vite. Familja jonë, si shumë familje të tjera, e ka paguar shtrenjtë çmimin e lirisë. Me jetë, me burgje, me sakrifica, me ndarje e me shumë dhimbje. Por asnjëherë nuk jemi penduar për rrugën e lirisë dhe për idealin që e kanë ndjekur të parët tanë”, deklaroi ai. Duke përfaqësuar zërin e familjeve të dëshmorëve, Fazliu ka theksuar se kërkohet epilog i drejtë dhe respektim i integritetit për ish-pjesëtarët e UÇK-së që po përballen me proceset gjyqësore në Hagë. “Prandaj sot, si pjesë e një familjeje që i ka dhënë shumë lirisë së Kosovës, kërkojmë drejtësi dhe dinjitet për çlirimtarët tanë. Kërkojmë drejtësi për Hashim Thaçin, Kadri Veselin, Jakup Krasniqin, Rexhep Selimin, Sali Mustafën – Calin dhe Pjetër Shalën”, theksoi ai. Gjatë fjalimit të tij, nga masa e pranishme është brohoritur sërish motoja “Jo në emrin tim!”, e cila tashmë është shndërruar në një nga parullat kryesore të këtyre tubimeve. Fazliu ka vlerësuar se personalitetet për të cilët po protestohet përbëjnë një shtyllë të rëndësishme historike, e cila duhet trajtuar në përputhje të plotë me përpjekjet mbarëpopullore për liri. “Ata janë pjesë e një periudhe historike që nuk mund t'i ndahet sakrificës së popullit dhe luftës për liri. Ne besojmë se e vërteta duhet të dëgjohet dhe drejtësia duhet të vendoset mbi fakte”, u shpreh ai. Sipas tij, nga instancat përkatëse nuk kërkohen favore apo trajtime preferenciale, por vetëm zbatim i drejtësisë dhe mbrojtje e kujtesës kolektive të luftës. “Si familje të dëshmorëve, ne nuk kërkojmë privilegj. Kërkojmë drejtësi, kërkojmë të vërtetën, kërkojmë që sakrifica e atyre që ranë për lirinë e Kosovës të mos harrohet”, tha Fazliu. Në fund të fjalës së tij, ai ka tërhequr vëmendjen te misioni që u takon gjeneratave të reja për të mos lejuar zbehjen e vlerave të luftës dhe të dëshmorëve. “Fahri e Bahri Fazliu dhe shumë dëshmorë të tjerë dhanë jetën, e shumë të tjerë vazhduan rrugën e sakrificës. E ne, brezi që erdhëm pas tyre, kemi për detyrë ta ruajmë kujtimin, dinjitetin dhe të vërtetën e kësaj kohe”, përfundoi ai.