Përplasja për Lojërat Mesdhetare 2030: Rama i kërkon ministrit Gashani të përkthejë letrën e ICMG-së

Kryetari i Komunës së Prishtinës, Përparim Rama, ka pasur një reagim të ashpër ndaj ministrit të Sportit dhe Rinisë, Blerim Gashani, në lidhje me ecurinë e organizimit të Lojërave Mesdhetare “Prishtina 2030”. Nëpërmjet një postimi publik, Rama ka bërë të ditur se Komiteti Ndërkombëtar i Lojërave Mesdhetare (ICMG) po përballet me mungesë përgjigjesh nga ana e institucioneve të Kosovës, situatë kjo që sipas tij ka shtyrë këtë komitet të paralajmërojë thirrjen e një mbledhjeje urgjente për të vendosur për hapat e ardhshëm. “Ministër, përktheje letrën! S’po e them unë, po e thonë ICMG që s’po ju përgjigjeni, prandaj kanë me thirrë mbledhje të jashtëzakonshme me kqyrë çka me bo me neve! Kjo është zyrtare!”, ka theksuar Rama në reagimin e tij. Po ashtu, i pari i kryeqytetit ka ngritur shqetësimin se gjatë takimeve me delegatët e ICMG-së janë shprehur pakënaqësi të theksuara ndaj kërkesës së kryeministrit Albin Kurti për të ndryshuar emërtimin e ngjarjes nga “Prishtina 2030” në “Kosova 2030”, si dhe synimit të kreut të ekzekutivit që të marrë vetë drejtimin e komitetit organizativ. Në krahun tjetër, ndërkohë që ministri Gashani ka dhënë garanci se Lojërat Mesdhetare do të organizohen me sukses, ai e ka cilësuar qasjen e kryetari Rama si sjellje të një fëmije të pakënaqur.