Komisionerja Kos paralajmëron Prishtinën: Ndryshimet në Ligjin për Gjykatën Speciale rrezikojnë rrugën drejt BE-së

Komisionerja evropiane për Zgjerim, Marta Kos, ka dhënë një mesazh të qartë se nismat e fundit për ndryshimin e Ligjit për Dhomat e Specializuara të Kosovës nuk mund të tolerohen, duke paralajmëruar se një hap i tillë do të dëmtonte rëndë procesin e integrimit evropian të vendit. Përmes një reagimi të publikuar në rrjetin social X, zyrtarja e lartë e BE-së bëri të ditur se ka zhvilluar një bashkëbisedim me kryenegociatorin Jeton Zulfaj, ku në fokus ka qenë e ardhmja eurointegruese e Kosovës. “Sot diskutova për rrugën e integrimit të Kosovës në Bashkimin Evropian me kryenegociatorin Jeton Zulfaj. Pavarësisht paqëndrueshmërisë institucionale gjatë dy viteve të fundit, Kosova ka shënuar përparim në reformat në fushën e sundimit të ligjit dhe në Planin e Rritjes. Ajo ka bërë gjithashtu përparim të mirë drejt përfshirjes në SEPA”, ka shkruar Kos. Megjithatë, ajo ka ngritur alarmin dhe ka shprehur qëndrim kundërshtues lidhur me zhvillimet e fundit që prekin këtë institucion drejtësie. “Ndryshimet e fundit në Ligjin për Dhomat e Specializuara të Kosovës janë të papranueshme. Miratimi dhe zbatimi i tyre do të binin ndesh me zotimet e Kosovës ndaj Bashkimit Evropian. Ato do të përbënin një hap serioz prapa në rrugën e Kosovës drejt BE-së”, ka theksuar ajo. Në përmbyllje të qëndrimit të saj, Kos ka vënë theksin te rëndësia e pazëvendësueshme e parimeve demokratike dhe e pavarësisë së sistemit të drejtësisë. “Respektimi i sundimit të ligjit dhe i institucioneve të pavarura gjyqësore është thelbësor për përgatitjen e hapave të ardhshëm të Kosovës në rrugën e saj drejt Bashkimit Evropian”, ka theksuar Kos.