“The Guardian”: Izraeli bllokon ndërtimin e bazës për trupat paqeruajtëse të Kosovës dhe Marokut në Gaza

Iniciativa e Bordit të Paqes të udhëhequr nga presidenti amerikan, Donald Trump, për dislokimin e një force ndërkombëtare stabilizimi në Rripin e Gazës po përballet me pengesa serioze, bën të ditur e përditshmja britanike “The Guardian”. Sipas raportimeve të kësaj medie, autoritetet izraelite po refuzojnë të lejojnë fillimin e punimeve për ngritjen e një kampi ushtarak, i cili do të shërbente për akomodimin e trupave ndërkombëtare, përfshirë kontingjentet nga Kosova dhe Maroku. Plani parashikonte që kjo bazë e përkohshme të strehonte 150 ushtarë ndërkombëtarë, si pjesë e një misioni më të gjerë që përfshin 500 trupa nga të dyja vendet, të cilët janë dërguar tashmë në kuadër të këtij angazhimi. Megjithëse kontrata për ndërtimin e këtij objekti iu besua muaji gusht kompanisë amerikane “Arkel International” me seli në Luiziana, punimet kanë mbetur pezull prej dy muajsh. Shkak për këtë është bërë refuzimi i Izraelit për të lejuar hyrjen e kontraktuesve dhe kamionëve të ndërtimit brenda territorit të Gazës. Burime të mirëinformuara mbi këtë çështje kanë konfirmuar për “The Guardian” se pa miratimin dhe dritën jeshile nga ana e Izraelit, zbatimi i këtij projekti mbetet i pamundur. Sipas projektit, baza e përkohshme është parashikuar të ngrihet brenda një zone të fortifikuar me përmasa 100 metra katrorë, në një hapësirë që dikur është përdorur nga Fondacioni Humanitar i Gazës.