Nga thirrjet “Arrestoni Ramën” te homazhet për krerët e UÇK-së: Politika bëhet pjesë e spektaklit në “Air Albania”

Atmosfera e zjarrtë në stadiumin “Air Albania”, ku rreth 18 mijë tifozë po ndjekin përballjen mes Kombëtares sonë dhe Bjellorusisë, është shoqëruar me zhvillime që kanë kaluar kufijtë e fushës së blertë. Si zakonisht në ngjarje të tilla të rëndësishme, mesazhet me karakter politik kanë marrë një vëmendje të veçantë nga shkallët e stadiumit. Në fokus të aparatit fotografik kanë rënë disa pankarta me përmbajtje provokuese dhe kombëtare. Mes tyre është dalluar qartë një parullë e madhe ku shkruhej “Arrestoni Ramën”, e shoqëruar në pjesën e poshtme me vizatimin e një flamingoje. Ndërkohë, tribunat ku qëndrojnë mbështetësit kuqezi nuk kanë harruar të shprehin solidaritetin e tyre me të kaluarën historike dhe figurat kyçe të vendit. Në një tjetër banderolë të shfaqur gjatë ndeshjes, është përcjellë një mesazh mbështetës për katër ish-liderët e Ushtrisë Çlirimtare të Kosovës që po përballen me procesin gjyqësor në Hagë, ku shkruhej: “Prangat e përkohshme, historia e përjetshme”.