Pjesëmarrja në Gjykatën Speciale, Abdixhiku zbulon emrin që do të përfaqësojë LDK-në

Lidhja Demokratike e Kosovës (LDK) ka konfirmuar zyrtarisht angazhimin e saj në Grupin Punues, i cili është themeluar me qëllim të hartimit të strategjisë së mbrojtjes për shkallën e dytë në Gjykatën Speciale. Vendimi është bërë i ditur nga kryetari i këtijsubjekti politik, Lumir Abdixhiku. Kreu i LDK-së ka njoftuar se i ka dhënë udhëzim udhëheqëses së Grupit Parlamentar të partisë që të nominojë akademik Kujtim Shalën si përfaqësues në këtë strukturë. Në rast se angazhimi i akademikut Shala bëhet i pamundur për arsye objektive, Abdixhiku shtoi se opcioni tjetër zyrtar do të jetë Jehona Lushaku-Sadriu. Duke komentuar këtë nismë, lideri i LDK-së nënvizoi se partia që drejton mbështet çdo bashkëpunim gjithëpërfshirës në këtë çështje, por njëkohësisht bëri thirrje për maturi dhe transparencë, duke kërkuar që të mos krijohen iluzione tek opinionpublik lidhur me peshën reale juridike të këtyre veprimeve. “Çdo përpjekje e përbashkët kombëtare është e mirëseardhur, për aq sa nuk i mashtrojmë qytetarët e Kosovës me iniciativa që s’kanë efekt juridik, gjithçka tjetër është e pranueshme”, përfundoi deklaratën e tij Abdixhiku.