Formë e lartë dhe sukses në miqësore: Shkëndija mposht pastër Kamjanin

Skuadra e Shkëndijës së Tetovës ka regjistruar një fitore komode me shifrat 3:0 në ndeshjen kontrolluese të zhvilluar kundër skuadrës debutuese në Ligën e Dytë, Kamjanit. Përballja e luajtur këtë të shtunë në stadiumin e fshatit Kamjan zgjoi interesim të jashtëzakonshëm te sportdashësit e rajonit të Pollogut, duke krijuar një ambient të ngrohtë dhe festiv. Ndeshja kishte një domethënie të veçantë për nikoqirët, të cilët po kalojnë një periudhë historike për klubin e tyre. Shumica e futbollistëve të Kamjanit janë prodhime të Shkollës së Futbollit të Shkëndijës, çka i dha një nuancë emocionale këtij dueli, ku vendasit u paraqitën me dinjitet dhe lanë përshtypje të mira. Megjithatë, përmbajtja taktike dhe epërsia në fushë e drejtuar nga trajneri Artim Pollozhani vendosi fatin e takimit, duke iu dhënë hapësirë në formacion edhe lojtarëve të rinj. Pjesa e parë solli golin e epërsisë për kuqezinjtë në minutën e 21-të. Pas një gjuajtjeje të Gjorgjievskit, portieri Ramadani devijoi fillimisht topin, por në zonën e rrezikut ndodhej Vane Kërstevski, i cili realizoi saktë për 0:1. Gjatë kësaj pjese, Kamjani rrezikoi përmes Livorekës në minutat 27 dhe 34, por pa arritur të ndryshojë rezultatin. Pjesa e dytë nisi sërish me ritëm nga mysafirët, të cilët në minutën e 49-të fituan një penallti. Nga pika e bardhë, Florent Ramadani u tregua i pagabueshëm, duke dyfishuar shifrat në 0:2. Epilogun e kësaj ndeshjeje miqësore e vendosi Krasniqi në minutën e 69-të, i cili përfitoi nga një top i kthyer pas intervenimit të portierit vendas Abazi ndaj Kërstevskit, duke vulosur rezultatin përfundimtar 0:3. Kjo përballje shërbeu si një test tejet i dobishëm për dy ekipet, duke dëshmuar vlerat e mirëfillta sportive dhe duke bashkuar dy komunitete futbollistike të Pollogut në një festë të vërtetë të sportit. Kamjani - Shkëndija 0:3 (0:1) Golashënues: Kërstevski 21’, Ramadani 49’ (pen.), Krasniqi 69’ SHKËNDIJA: Amzai, Murati (c), Ceka, Rushiti, Abdurahmani, Xheladini, Abazi, Isa, Ramadani, Kërstevski, Gjorgjievski. Luajtën edhe: Ibraimi, Krasniqi, Islami, Ademi, Rafa, Akiki, Ceka.