Bilanci i dhunës në protestë, kreu i Policisë: Mbi 70 efektivë të lënduar, ndërhyrja ishte plotësisht e ligjshme

Kreu i Policisë së Shtetit, Skënder Hita, ka dalë në një konferencë për mediat ku ka folur në lidhje me zhvillimet e fundit dhe protestat e dhunshme, duke bërë me dije se më shumë se 70 punonjës të policisë kanë pësuar lëndime gjatë kryerjes së detyrës. Gjatë fjalës së tij, Hita mbrojti veprimet e uniformave blu, duke theksuar se ndërhyrja e forcave të rendit është mbështetur tërësisht te ligji dhe standardet e zbatueshme në Republikën e Shqipërisë. Ai sqaroi se kjo tubim nuk pasqyron kauzën apo vullnetin e studentëve dhe bëri thirrje të prerë për largim nga aktet e dhunës, ndërsa konfirmoi gjithashtu se janë vënë në pranga persona të dyshuar për grabitje bankash. Duke iu referuar dëmeve të shkaktuara, përfshirë edhe sulmin ndaj një institucioni financiar gjatë mesditës, numri një i Policisë së Shtetit lëshoi një paralajmërim të fortë. Ai u shpreh se institucionet ligjzbatuese do të vazhdojnë të veprojnë me forcën e ligjit për të vënë para përgjegjësisë çdo autor, nëse sjelljet e dhunshme do të vijojnë. “Funksionaliteti i dhunës ka qenë në përputhje me të gjitha ligjet e Republikës së Shqipërisë dhe standardet që ne kemi. Janë mbi 70 policë të plagosur, çka tregon qartë se atje ka pasur një dhunë. Sa u takon të gjithë organizatorëve në protestë, dihet shumë mirë që ajo nuk është një protestë e studentëve. Ne duhet të distancohemi nga dhuna dhe nuk duhet që të jemi pjesë e saj. Deri në këto momente, sa u takon edhe veprimtarive të vjedhjeve të bankave, janë arrestuar persona për këto akuza. Vazhdon puna për identifikimin e këtyre personave. Edhe sot në drekë u dëmtua një institucion financiar. Nëse kjo dhunë vazhdon me këto përmasa, do të vazhdojnë me forcën e ligjit dhe të vëmë përpara të gjithëve”, deklaroi Hita.