Deklarata për “fundet e gjata” ndez politikën italiane, ministri kërkon falje por përballet me revoltën e parlamentarëve

Ministri i Jashtëm i Italisë, Antonio Tajani, është gjendur në qendër të një stuhie reagimesh publike për shkak të një deklarate të bërë rreth kritereve se si duhet zgjedhur bashkëshortja. Komentet e tij kanë shkyer valë indinjate nga forcat opozitare, sindikatat dhe shoqëria civile, ndërkohë që hapësira digjitale është mbushur me ironi dhe materiale satirike ndaj zyrtarit të lartë. Gjatë një fjalimi në një aktivitet publik javën e shkuar, kreu i diplomacisë italiane sugjeroi se për martesë duhet kërkuar një grua “serioze” që preferon të veshë “funde më të gjata”, duke i cilësuar ato si më të përshtatshme dhe të besueshme për ngritjen e një familjeje. Edhe pse pas shpërthimit të kritikave Tajani kërkoi ndjesë publike, duke u arsyetuar se fjalët e tij ishin nxjerrë nga konteksti dhe se nuk kishte për qëllim fyerjen e gjinisë femërore, kjo kërkesë për falje nuk e zbuti aspak situatën. Si kundërpërgjigje ndaj kësaj situate, senatore nga radhët e Partisë Demokratike, lëvizjes Italia Viva, të Gjelbërve, Aleancës së Majtë dhe Lëvizjes Pesë Yjet u paraqitën në ndërtesën e Parlamentit të veshura me funde. “Ne gëzojmë lirinë e plotë për të zgjedhur si të vishemi”, theksoi Raffaella Paita nga Italia Viva, duke shtuar se autonomia dhe dinjiteti i grave nuk mund të gjykohen nga centimetrat e veshjes apo vendimet e tyre vetjake. Edhe Simona Malpezzi nga radhët e Partisë Demokratike e quajti këtë qasje si dëshmi të një mendësie të thellë patriarkale që ende mbizotëron. Situata u tensionua edhe më tej pas ndërhyrjes së Roberto Vannaccit, i cili deklaroi se mes një gruaje me fund të gjatë dhe një tjetre me fund të shkurtër, ai personalisht do të preferonte “një grua pa fund”. Për më tepër, figura të ndryshme të opozitës vërshuan rrjetet sociale me fotografi ku shfaqeshin me funde, ku spikat rasti i Andrea Ciullit, i cili publikoi një portret të gjeneruar nga inteligjenca artificiale për të përcjellë mesazhin se vlera e një gruaje nuk përcaktohet nga garderoba. Lideri i Italia Viva, Matteo Renzi, tha hapur se Tajani është shndërruar në një “meme” të vërtetë, ndërkohë që fotomontazhet satirike me imazhin e ministrit u shpërndanë me shpejtësi në rrjet, duke tërhequr vëmendjen edhe të mediave ndërkombëtare. Edhe organizatat sindikale në Itali e dënuan këtë qasje, duke theksuar se etiketimi i grave në kategori si “serioze”, “të besueshme” apo “tërheqëse” në bazë të mënyrës së të veshurit risjell në skenë stereotipe të tejkaluara. Në të njëjtën linjë, Konferenca Ipeshkvnore Italiane (CEI) bëri thirrje publike për më shumë lartësi morale, respekt dhe dinjitet në trajtimin e figurës së gruas. Në krahun tjetër, kryeministrja Giorgia Meloni u përpoq ta ulë tensionin, duke i cilësuar deklaratat e bashkëpunëtorit të saj si një “përshtatje e ngathët fjalësh” dhe kërkoi që ngjarja të mos fryhet artificialisht. Edhe ministri i Mbrojtjes, Guido Crosetto, doli në mbrojtje të Tajanit, duke argumentuar se ai thjesht kishte shprehur preferencat e tij personale për të ardhmen e djalit të tij dhe jo një rregull të përgjithshëm se si duhet të vishen femrat. Pavarësisht këtyre mbrojtjeve institucionale, debati rreth kësaj çështjeje vazhdon të mbetet i ndezur në opinionin publik italian, duke e lënë Tajanin në fokusin e kritikave të ashpra. keter