Zbardhen çiftet e Kupës: Skuadrat shqiptare njohin kundërshtarët në fazën e 1/8-ave

Në ambientet e Federatës së Futbollit të Maqedonisë (FFM) është hedhur shorti zyrtar për fazën e 1/8 së finales në Kupën e Maqedonisë së Veriut, duke caktuar kështu përballjet e ardhshme për katër skuadrat tona pjesëmarrëse. Klubet shqiptare, Bashkimi, Shkëndija e Haraçinës, Struga Trim Lum dhe Arsimi i Çegranit, kanë mësuar emrat e rivalëve me të cilët do të përballen në këtë garë masive për trofeun e dytë më të rëndësishëm në vend. Vëmendja kryesore padyshim që do të përqendrohet te supersfida mes dy përfaqësueseve të elitës së futbollit vendor, ku kumanovarët e Bashkimit do të maten me forcat ndaj Shkëndijës së Haraçinës në një duel direkt shumë interesant. Ndërkohë, kampionët e Struga Trim Lum do të kërkojnë kalimin e turit përballë Bellasicës, kurse skuadra e Arsimit nga Çegrani do të përballet me sfidën e vështirë kundër Brerës. Kalendari i ndeshjeve është caktuar zyrtarisht dhe takimet e kësaj faze do të zhvillohen përgjatë datave 27 dhe 28 tetor. Çiftet e plota për fazën e 1/8 së finales janë si vijon: - Skopje – Novaci - Struga Trim Lum – Bellasica - Brera – Arsimi - Vardari – Tikveshi - Pelisteri – Sileksi - Rabotniçki – Sasa - Makedonija Gjorçe Petrov – Bregallnica - Bashkimi – Shkëndija e Haraçinës