Tensione dhe dëme në proteste: Dhoma e Tregtisë dhe tetë shoqata biznesi i drejtojnë apelin Policisë

Dhoma e Tregtisë dhe Industrisë Tiranë, në bashkëpunim me tetë shoqata të rëndësishme biznesi, kanë reaguar zyrtarisht pas akteve të dhunës dhe dëmeve të shkaktuara në pronën publike e private gjatë protestave të zhvilluara në kryeqytet. Në një deklaratë të përbashkët, ku bëjnë pjesë Këshilli i Agrobiznesit Shqiptar (KASH), Manifaktura Shqiptare, Shoqata e Ndërtuesve, Shoqata Shqiptare e Turizmit, Shoqata e Industrisë së Përpunimit të Qumështit (IPQ), Shoqata e Industrisë Ushqimore Shqiptare, Shoqata e Bimëve Medicinale dhe Shoqata e Grave Profesioniste Afariste e Zejtare, shprehet shqetësimi i thellë për sulmet ndaj institucioneve, bankave, qendrave tregtare dhe objekteve të sipërmarrjeve. Përfaqësuesit e bizneseve theksojnë se e drejta për të protestuar në mënyrë paqësore përbën një shtyllë themelore të shoqërisë demokratike dhe duhet të mbrohet me çdo kusht nga shteti, ndërsa qytetarët duhet të kenë hapësirën e nevojshme për të shprehur kërkesat e tyre përmes dialogut. Megjithatë, sipas komunitetit të biznesit, asnjë kauzë apo pakënaqësi politike nuk mund të shërbejë si alibi për zjarrvënie, vandalizëm dhe shkatërrim të pronës. Ata nënvizojnë se pas çdo sipërmarrjeje fshihen investime, vite sakrificash, vende pune dhe familje që varen ekonomikisht prej tyre. Në këtë kuadër, i bëhet thirrje e prerë Policisë së Shtetit dhe institucioneve përgjegjëse që të ndërmarrin masa konkrete parandaluese, të sigurojnë prani të shtuar në zonat e rrezikuara dhe të garantojnë rendin publik, mbrojtjen e jetës dhe paprekshmërinë e pronës. Organizatorët e tubimeve dhe forcat politike nxiten gjithashtu që të distancohen prerazi nga çdo formë dhune, duke kontribuar në ruajtjen e karakterit paqësor të protestave dhe duke mos lejuar që qytetarët e ndershëm të bien pre e tensioneve.