Bilanci i dhunës në Tiranë: 55 të arrestuar dhe 98 nën hetim pas protestës së 14 tetorit

Pas tubimit të dhunshëm të zhvilluar ditën e djeshme në kryeqytet, Policia e Shtetit ka bërë të bilancin zyrtar të ngjarjeve, duke njoftuar arrestimin në flagrancë të 55 personave dhe nisjen e procedimit penal në gjendje të lirë për 98 të tjerë. Sipas informacionit zyrtar, gjatë protestës së datës 14 tetor, e cila nisi përpara Ministrisë së Arsimit në rrugën e Durrësit dhe më pas u shtri në zona të tjera, grupe pjesëmarrësish të maskuar kanë ushtruar dhunë ekstreme. Ata kanë hedhur gurë, pllaka, mjete të forta metalike, kapsolla dhe kokteje molotovi në drejtim të forcave të rendit dhe institucioneve shtetërore. Si pasojë e këtyre akteve vandaliste, janë shkaktuar dëme të konsiderueshme në pronën publike dhe private. Janë dëmtuar muret, dritaret dhe kangjellat e Ministrisë së Arsimit, si dhe sinjalistika rrugore, trotuaret dhe tabelat e reklamave. Gjatë përplasjeve, dëme materiale kanë pësuar edhe banka, institucione financiare dhe biznese të ndryshme. Më tej, protestuesit janë zhvendosur në disa nga akset kryesore të Tiranës, përfshirë bulevardet “Dëshmorët e Kombit” dhe “Gjergj Fishta”, si dhe rrugët “Muhamet Gjollesha” dhe ajo e Durrësit, duke shkatërruar fasada xhami, bankomate, kamera sigurie dhe semaforë. Situata ka eskaluar edhe më shumë kur një pjesë e protestuesve ka depërtuar brenda rrethimit të Komisariatit të Policisë Nr. 2. Aty ata kanë sulmuar godinën me mjete të forta e lëndë piroteknike, duke dëmtuar xhamat dhe derën hyrëse, ndërsa kanë djegur një automjet policie dhe kanë shkatërruar tre makina të tjera të parkuara. Policia thekson se efektivët e shërbimit janë përballur vazhdimisht me sulme të dhunshme gjatë gjithë tubimit. Si pasojë e hedhjes së sendeve të forta dhe lëndëve plasëse nga protestuesit e maskuar, 51 punonjës policie kanë pësuar dëmtime trupore. Nën drejtimin e Prokurorisë së Tiranës, strukturat hetimore kanë finalizuar veprimet procedurale, duke vënë në pranga 55 shtetas, konkretisht: E. L., 18 vjeç; N. T., 23 vjeç; H. A., 18 vjeç; B. M., 20 vjeç; B. B., 22 vjeç; N. Sh., 18 vjeç; A. Th., 19 vjeç; K. B., 28 vjeç; S. F., 18 vjeç; S. A., 45 vjeçe; A. H., 18 vjeç; J. P., 29 vjeç; Z. M., 30 vjeç; F. B., 18 vjeç; Sh. M., 22 vjeç; E. B., 23 vjeç; V. A., 36 vjeç; A. M., 18 vjeç; D. L., 18 vjeç; N. Ll., 28 vjeç; K. B., 26 vjeç; L. P., 20 vjeç; E. Sh., 18 vjeç; E. K., 19 vjeç; Xh. M., 26 vjeç; Xh. M., 24 vjeç; E. T., 18 vjeç; A. T., 30 vjeç; E. L., 19 vjeç; V. Ll., 27 vjeç; A. K., 22 vjeç; A. Ç., 36 vjeç; G. Q., 18 vjeç; A. Ç., 37 vjeç; D. D., 30 vjeç; E. S., 26 vjeç; E. C., 19 vjeç; E. C., 19 vjeç; A. B., 24 vjeç; G. S., 22 vjeç; E. Sh., 19 vjeç; I. M., 23 vjeç; A. A., 44 vjeç; K. O., 20 vjeç; A. A., 24 vjeç; A. N., 19 vjeç; A. Z., 28 vjeç; A. J., 18 vjeç; R. C., 19 vjeç; S. H., 20 vjeç; K. B., 24 vjeç; R. S., 21 vjeç; R. D., 18 vjeç, si dhe dy të mitur të moshës 15 dhe 17 vjeç. Ndërkohë, krahas arrestimeve, 98 persona të tjerë janë proceduar penalisht në gjendje të lirë. Grupi i posaçëm hetimor, në bashkëpunim të ngushtë me organin e akuzës, po vijon punën intensive për dokumentimin e plotë ligjor dhe identifikimin e personave të tjerë të përfshirë në aktet e dhunës.