Daut Haradinaj lëshon akuza të forta: Një bashkëpunëtor i shërbimeve serbe u takua në Dubai, po vëzhgohet nga AKI

Anëtari i Aleancës për Ardhmërinë e Kosovës, Daut Haradinaj, ka hedhur dyshime të rënda mbi aktivitetet e një personi që, sipas tij, bashkëpunon ngushtë me strukturat serbe dhe së fundmi ka zhvilluar një takim të dyshimtë në Dubai. Gjatë një paraqitjeje televizive në emisionin “Rubikon”, Haradinaj theksoi se posedon informacione operative për këtë rast dhe se lëvizjet e personit në fjalë po monitorohen në vazhdimësi nga organet e sigurisë së shtetit. “Serbia ka shumë njerëz në terren, ka sekserë. Fatkeqësisht, çdo ditë na vijnë informacione të reja për emra të ndryshëm,” u shpreh ai gjatë bisedës. Duke e cilësuar Dubain si një pikë takimi të preferuar për këto individë, ai bëri me dije se Agjencia e Kosovës për Inteligjencë (AKI) është në dijeni të plotë të këtyre zhvillimeve. “E di që e kanë bërë adresë kryesore Dubain tash. Atje po shkojnë, po rreziten dhe po takohen. E di që AKI-ja po i ndjek,” shtoi tutje ai. Në mbështetje të pretendimeve të tij, Haradinaj përmendi edhe një detaj kohor, duke iu referuar datës 30 shtator dhe një darke ku, sipas tij, ka marrë pjesë një figurë e caktuar. “Bile, shpresoj që ai që po i referohem po më dëgjon, më 30 shtator kishte qenë në një darkë,” tha ai, ndërkohë që zgjodhi të mos zbulojë emra konkretë apo identitetin e personave të tjerë të pranishëm në atë tubim. Megjithatë, ai paralajmëroi se shumë shpejt mund të ketë zhvillime konkrete nga organet e rendit, duke lënë të kuptohet se Policia e Kosovës është duke u marrë intensivisht me këto hetime. “Shpresoj që shumë shpejt unë dhe ti kemi me pa në kamera të arrestuar. E di që policia e heton dhe e ndjek. Kurrë nuk flas kot,” u shpreh ai. Në përmbyllje, Haradinaj bëri të qartë se nuk ka për qëllim të ndërhyjë në punën e organeve të drejtësisë, por dërgoi një mesazh të qartë paralajmërues për këdo që mendon se mund të veprojë kundër interesave të vendit. “Unë nuk po du as me ndërhy në drejtësi, se e di që drejtësia i kryen punët e veta, por mos t’i hyjë mendja dikujt se në vitin 2026 mund të bashkëpunojë me Serbinë dhe Kosova nuk e di,” përfundoi Haradinaj.