Alarm në kryeqytet: Zhduken dy vajza brenda një dite, mes tyre edhe një e mitur

Dy raste të ndara të zhdukjes së vajzave janë regjistruar gjatë ditës së mërkurë në qytetin e Prishtinës, duke vënë në lëvizje organet e rendit për gjetjen e tyre, konfirmon Policia e Kosovës. Sipas buletinit zyrtar 24-orësh të forcave të rendit, rasti i parë ka të bëjë me një të mitur. Një grua ka denoncuar në polici se e bija e saj e mitur është larguar nga banesa në orët e mëngjesit për në drejtim të shkollës, por nuk është kthyer më në shtëpi. “Lagjja Ulpianë, Prishtinë 14.10.2026-07:00. Ankuesja femër kosovare ka raportuar se vajza e saj e mitur ka dalë nga shtëpia për të shkuar në shkollë dhe nuk është kthyer më. Rasti nën hetime”, thuhet në njoftimin e Policisë. Ndërkohë, një tjetër rast i ngjashëm është raportuar po atë ditë në një zonë tjetër të kryeqytetit, ku një tjetër familjare ka kërkuar ndihmën e autoriteteve pasi vajza e saj është larguar nga shtëpia pa lënë gjurmë. “Rr Ibrahim Kelmendi, Prishtinë 14.10.2026 – 19:00. Ankuesja ka raportuar se vajza e saj ka dalë nga shtëpia dhe ende nuk është kthyer. Rasti është duke u hetuar”, shtohet tutje në raportin policor, ndërsa autoritetet kompetente po vazhdojnë hetimet intensive për të zbardhur rrethanat e të dyja ngjarjeve.