“E kaluara nuk nis me ju”: Gani Mehmeti i kthen përgjigje të ashpër Ivica Daçiqit për Prizrenin

Deklaratat e fundit të zyrtarit serb, Ivica Daçiq, se gjoja Prizreni ka qenë kryeqyteti i parë serb dhe pretendimet e tij revizioniste se flamuri i Serbisë do të valëvitet sërish në këtë qytet, kanë ngjallur reagime të shumta në opinionin publik. Këto pretendime për historinë e Prizrenit kanë riaktualizuar debatin mbi të kaluarën e Kosovës dhe mënyrën se si ajo manipulohet nga zyrtarët e Beogradit. Ndaj këtyre deklaratave ka reaguar ashpër opinionisti Gani Mehmeti, i cili i është kundërpërgjigjur Daçiqit duke hedhur poshtë narrativën e tij historike dhe duke theksuar se rrënjët e këtyre trojeve janë shumë më të hershme se periudha e mesjetës serbe. Mehmeti e ka sfiduar hapur zyrtarin serb që të mos e shikojë historinë e Prizrenit vetëm përmes prizmit të interesave politike dhe chauviniste serbe, por të hulumtojë më gjerësisht. “Së pari, para se të bëhej ‘kryeqyteti’ i parë serb, i kujt ishte Prizreni? A e ke mësuar paksa historinë, apo vetëm flet pa menduar për atë që të pëlqen ty? Shko edhe pak më larg, lexo dhe mësoje historinë, sepse, nëse historia serbe filluaka aty, atëherë ju qenkeni tepër të vonshëm”, ka deklaruar Mehmeti. Ai ka vlerësuar se e kaluara e Kosovës nuk mund të ngushtohet vetëm në periudhën e zgjerimit të shtetit mesjetar serb në këto territore, duke përdorur edhe një frazë në gjuhën serbe për t'ia ilustruar këtë fakt Daçiqit. “A e ke dëgjuar atë shprehjen tuaj në gjuhën serbe: ‘Janko mbërriti me vonesë në Kosovë’?”, u shpreh ai, duke nënvizuar se prania e popullit autokton në këto treva daton shumë kohë para vendosjes së pushteteve mesjetare serbe. Në fund të reagimit të tij, Mehmeti ka përsëritur se shqiptarët e shohin Kosovën si vatrën e tyre të lashtë, duke kundërshtuar çdo tendencë për t'ia tjetërsuar identitetin dhe historinë. “Historia nuk fillon me ju, Daçiq. Ajo është shumë më e hershme; ne kemi qenë këtu prej mijëra vjetësh. Ne kemi lindur dhe jemi rritur këtu, këtu është djepi ynë. Ju e keni lënë diku në Kaukaz; shkoni dhe kërkojeni djepin tuaj atje”, përfundon reagimi i Mehmetit.