Valë e re protestash në vend: Gjimnazistët i bashkohen studentëve, tensionohet situata në rrugët e kryeqytetit

Përmasat e protestës masive në vend janë zgjeruar ndjeshëm, pasi krahas studentëve të fushave të ndryshme, në sheshe kanë dalë edhe nxënësit e shkollave të mesme. Të rinjtë e Fakultetit të Historisë dhe Filologjisë kanë boshatisur auditorët duke bojkotuar procesin mësimor, për t'iu bashkuar marshimit në kryeqytet, ku nën thirrjet “Rama jep dorëheqjen” po kërkojnë ndryshimin rrënjësor të sistemit politik. Në Tiranë, situata ka shënuar momente tensioni përgjatë Rrugës së Elbasanit. Një grup protestuesish, ku bëjnë pjesë edhe gjimnazistë të shumtë në numër, kanë dëmtuar sinjalistikën rrugore, duke thyer xhamat e Ministrisë së Infrastrukturës dhe duke shkatërruar semaforët me sende të forta. Përballë kësaj situate, në terren kanë ndërhyrë Forcat “Shqiponja” me qëllim shpërndarjen e turmës së të rinjve. Mobilizimi ka përfshirë edhe institucionet e tjera arsimore në kryeqytet. Gjimnazistët janë dyndur në rrugë, ndërkohë që nxënës janë nisur drejt Tiranës edhe nga Divjaka. Një episod është shënuar te shkolla “Asim Vokshi”, ku sipas raportimeve nga terreni, nxënësit kanë shprehur vullnetin për t'iu bashkuar protestës, por drejtoresha e institucionit nuk i ka lejuar të largohen nga ambientet e shkollës. Bojkoti i mësimit është shtrirë gjeografikisht në disa qytete të vendit. Në Durrës, studentët e Kampusit të UAMD-së në Spitallë kanë nisur aksionin e tyre duke hyrë në godinën e Fakultetit Ekonomik, ku u kanë bërë thirrje kolegëve të tyre në auditorë që të braktisin mësimin. Ata kanë paralajmëruar një tubim në sheshin qendror të qytetit, pasi më parë të kalojnë pranë godinave të fakulteteve të tjera dhe më pas drejt Bashkisë së Durrësit. Edhe në Korçë, Fakulteti i Bujqësisë është paraqitur i boshatisur këtë mëngjes. Pavarësisht se pedagogët kanë qenë të pranishëm, mbi 80% e studentëve kanë bojkotuar mësimin në shenjë solidarizimi me protestën kombëtare. Studentët dhe nxënësit e këtij qyteti kanë organizuar gjithashtu një tubim të paralajmëruar për t'u mbajtur në orën 11:00 në qendër të Korçës. Këto protesta, të cilat kanë nisur prej më shumë se 130 ditësh në kryeqytet, gjatë dy ditëve të fundit kanë marrë një trajtë më të ashpër dhe të dhunshme. Protestuesit janë përplasur fizikisht me efektivët e policisë, ndërsa situata e tensionuar ka përfshirë edhe dëmtimin e disa prej institucioneve kyçe në vend.