Rama nga ambientet e djegura të Kolegjit të Europës: Dhuna nuk është zëri i studentëve, jemi të hapur për dialog

Kryeministri Edi Rama ka zhvilluar një vizitë në mjediset e Kolegjit të Europës në Tiranë, të cilat u dëmtuan nga zjarri gjatë protestave të fundit. Nga vendngjarja, kreu i qeverisë ka dënuar ashpër aktet e dhunës, duke nënvizuar se veprime të tilla nuk përkojnë me aspiratat dhe vlerat e brezit të ri. “Deri dje kjo ishte zyra e Kolegjit të Europës, shkollës së Europës së bashkuar, që e çelën në Shqipëri së bashku udhëheqësit europianë. Sot kjo është rrënoja e duarve që nuk janë dhe s’mund të jenë kurrë duart e studentëve”, deklaroi Rama, duke distancuar qartë studentët nga aktet e shkatërrimit. Në fjalën e tij, Kryeministri përsëriti gatishmërinë e qeverisë për të mbajtur dyert e komunikimit të hapura me studentët. Ai theksoi se për çdo shqetësim apo kërkesë të arsyeshme, ekzekutivi mbetet i angazhuar për dialog konstruktiv dhe gjetjen e zgjidhjeve konkrete. “Studentët janë e ardhmja, që shohin larg dhe duan të shkojnë më larg dhe më shpejt. Studentët janë gjithnjë të mirëpritur dhe për ta jemi gjithnjë gati të ulemi, të flasim, të diskutojmë dhe të gjejmë zgjidhje për gjërat që kërkojnë zgjidhje”, u shpreh më tej Rama. Gjatë këtij prononcimi, kreu i qeverisë hodhi akuza të drejtpërdrejta ndaj opozitës, duke e akuzuar atë për instrumentalizim të situatës me qëllim bllokimin e rrugëtimit integrues të vendit. Sipas tij, këto akte dhune janë përpjekje për ta rikthyer Shqipërinë në të shkuarën, larg progresit të viteve të fundit. “Janë duart e atyre që përpiqen të ulin poshtë Shqipërinë, janë duart e një opozite e cila me maska të verbërish përpara, me zjarre e hekur, kërkon ta rikthejë Shqipërinë aty ku Shqipëria nuk do të rikthehet kurrë. Kërkon ta rikthejë Shqipërinë në humnerën nga ku ne të gjithë së bashku e nxorëm dhe prej ku po e ngjisim drejt majës historike, drejt ëndrrës së të gjithë shqiptarëve në breza, BE-së”, përfundoi kryeministri.