Dita Botërore e Gruas Rurale: Nderimi i shtyllës së zhvillimit dhe sigurisë ushqimore

Sot mbarë bota i kushton vëmendje të veçantë Ditës Botërore të Gruas Rurale, një datë kjo që shërben për të vlerësuar kontributin e pazëvendësueshëm të grave që jetojnë dhe punojnë në zonat rurale. Angazhimi i tyre është thelbësor në forcimin e komuniteteve dhe përmirësimin e mirëqenies së përgjithshme shoqërore. Zanafilla e kësaj dite daton që nga viti 1995, kur organizatat e shoqërisë civile e propozuan këtë nismë gjatë Konferencës së Katërt Botërore për Gratë në Pekin. Megjithatë, zyrtarizimi i saj ndodhi në vitin 2007, kur Asambleja e Përgjithshme e Kombeve të Bashkuara vendosi ta përfshijë këtë datë në kalendarin e saj zyrtar. Shënimi i parë i kësaj dite u realizua më 15 tetor 2008. Ky vendim erdhi si rezultat i një rezolute të OKB-së, e cila nënvizoi rolin jetik të gruas rurale në ruajtjen e bujqësisë, nxitjen e zhvillimit rural, garantimin e sigurisë ushqimore dhe luftën e vazhdueshme kundër varfërisë në zonat e largëta. Pavarësisht rëndësisë që kjo ditë mbart në shkallë globale, në Kosovë nuk është planifikuar asnjë aktivitet zyrtar apo institucional për të shënuar këtë përvjetor.