Revolucion në PPP: Qeveria ndryshon rregullat e lojës dhe shfuqizon vendimin e dekadës së shkuar

Qeveria shqiptare ka ndërmarrë një hap të rëndësishëm në drejtim të reformimit të proceseve të partneritetit publik-privat (PPP) dhe koncesioneve. Përmes një vendimi të ri, ekzekutivi ka vendosur të shfuqizojë rregulloren e vitit 2013, duke vendosur një kuadër të ri ligjor për mënyrën se si vlerësohen studimet e fizibilitetit, si dhe procedurat e dhënies, ndryshimit apo transferimit të këtyre kontratave. Në draftin e miratuar këtë të mërkurë nga Këshilli i Ministrave, përcaktohet se Agjencia e Trajtimit të Koncesioneve dhe Partneritetit Publik Privat ka një afat prej tre muajsh, duke nisur nga hyrja në fuqi e vendimit, për të përgatitur dhe miratuar dokumentacionin standard. Këto dokumente do të bëhen publike nëpërmjet Agjencisë së Prokurimit Publik, duke siguruar kështu një transparencë më të lartë në këto procese. Një tjetër risi që sjell ky draft është detyrimi për hartimin e manualeve dhe udhëzimeve shpjeguese. Këto dokumente do të shërbejnë si udhërrëfyes i detyrueshëm për të gjitha autoritetet dhe entet kontraktore. Sipas tekstit të draftit, çdo institucion që angazhohet në aktivitete të kësaj natyre do të jetë i detyruar t'u përmbahet strikt këtyre manualeve, duke unifikuar praktikën administrative në nivel kombëtar. Ky ndryshim mbështetet në ligjin nr. 88/2025, “Për koncesionet dhe partneritetin publik privat”, me propozim të Ministrisë së Ekonomisë dhe Inovacionit. Me hyrjen në fuqi të këtij akti, vendimi nr. 575 i datës 10 korrik 2013, i cili rregullonte deri më tani vlerësimin dhe dhënien e koncesioneve, shfuqizohet zyrtarisht. Vendimi pritet të hyjë në fuqi menjëherë pas botimit në Fletoren Zyrtare. Zbatimi i këtyre rregullave të reja është bërë detyrim për të gjitha institucionet qendrore dhe ato vendore, të cilat do të duhet të përshtatin aktivitetin e tyre sipas standardeve të reja të përcaktuara nga qeveria.